لاہور میں سردی سے بچنے کیلئے چولہا جلانے والی ماں 2 بچوں سمیت جھلس گئی جبکہ بورے والا میں کمرے کے اندر گیس سلنڈر پھٹنے سے 4افراد جھلس کر جاں بحق ہوگئے ۔ تفصیل کے مطابق یہ افسوسناک واقعہ لاہور کے علاقے مانگا منڈی میں پیش آیا جہاں گھر میں آگ لگنے سے خاتون سمیت 2 بچے جھلس گئے۔ پولیس نے بتایا کہ گھر کی بالائی منزل پر مقیم گھر والوں نے سردی کی شدت سے بچنے کے لیے کمرے میں چولہے پر آگ جلائی ہوئی تھی کہ اس دوران آگ نے بستر بھی لیپیٹ میں لے لیا، واقعے کے وقت کمرے میں صرف دونوں بچے ہی موجود تھے جن کو آگ سے بچانے کی کوشش میں والدہ بھی جھلس گئی، متاثرہ افراد کو طبی امداد کے لیے ہسپتال منتقل کردیا گیا جہاں بچوں کی حالت خطرے باہر ہے تاہم خاتون کا جسم 20 فیصد جھلس چکا ہے۔ادھر بورے والا میں کمرے کے اندر گیس سلنڈر پھٹنے سے 4افراد جھلس کر جاں بحق ہو گئے، ریسکیو 1122 نے بتایا کہ گھر کے اندر کمرے میں سلنڈر پھٹنے سے آگ بھڑک اٹھی جس کے نتیجے میں 4افراد جھلس کر جاں بحق ہوگئے جن میں دو معصوم بچے اور ان کے والد شامل ہیں جب کہ بچوں کی ماں کو تشویش ناک حالت میں ملتان نشتر ہسپتال ریفر کیا گیاجو بعد ازاں جانبر نہ ہو سکی۔بتایا گیا کہ یہ واقعہ فرید ٹائون کے علاقے میں پیش آیا جہاں دانش اپنی فیملی کے ساتھ سو رہا تھا اور6ماہ کے بچے کے لیے دودھ گرم کرنے کی غرض سے کمرے میں سلنڈر کو چلایا گیا جو دھماکے سے پھٹ گیا اور کمرے میں آگ پھیل گئی جس کی زد میں آکر تین افراد جھلس کر موقع پر ہی جاں بحق ہوگئے، بچوں کی ماں ہسپتال پہنچ کر دم توڑ گئی۔ وزیر اعلی پنجاب مریم نواز شریف نے بوریوالا میں سلنڈر پھٹنے سے کمسن بچوں اور میاں بیوی کے جاں بحق ہونے پر اظہار افسوس کیا،وزیر اعلی مریم نواز شریف نے سو گوار خاندان سے اظہار ہمدردی کی، وزیر اعلی مریم نواز شریف نے کمشنر ملتان سے رپورٹ طلب کی ،وزیر اعلی مریم نواز شریف نے صوبہ بھر میں ناقص سلنڈر پر پابندی یقینی بنانے کی بھی ہدایت کردی۔

کریڈٹ : انڈیپنڈنٹ نیوز پاکستان-آئی این پی