صوبائی دارالحکومت سمیت پنجاب کے مختلف علاقوں میں بارش سے موسم خوشگوار ہوگیا جبکہ نشیبی علاقے زیر آب آگئے،بارش کے باعث بجلی کا نظام بھی مفلوج ہو گیا،متعدد فیڈرز ٹرپ کرنے کی وجہ سے کئی علاقے بجلی سے محروم ہو گئے۔ ہفتہ کو صوبائی دارالحکومت میں صبح کے وقت ہوا کے ساتھ کالے بادل چھائے اور پھر مختلف علاقوں میں کہیں ہلکی کہیں تیز بارش ہوئی۔ اسلام پورہ ، گوالمنڈی، ایبٹ روڈ، ہال روڈ، مال روڈ ، ڈیوس روڈ، گڑھی شاہو، نشتر کالونی، گلشن راوی، ہربنس پورہ سمیت شہر بھر میں بارش سے موسم خوشگوار ہو گیا جبکہ نشیبی علاقے زیر آب آگئے۔ گلشن راوی کے علاقے میں سب سے زیادہ 90 ملی میٹر بارش ریکارڈ کی گئی جبکہ جیل روڈ پر 16.25، ایئر پورٹ پر 12 ، گلبرگ میں 10 ، لکشمی چوک میں 54 ملی میٹر اور اپرمال میں 17 ملی میٹر بارش ریکارڈ کی گئی۔ مغلپورہ میں 18 ملی میٹر، تاجپورہ میں 25 ملی میٹر ، نشتر ٹان میں 32 ملی میٹر ، چوک ناخدا میں 15 ملی میٹر ، پانی والا تالاب میں 51 ملی میٹر، جوہر ٹان میں 24 ملی میٹر اور قرطبہ چوک میں 42 ملی میٹر بارش ریکارڈ کی گئی۔ بارش کے باعث بجلی کا نظام بھی مفلوج ہو گیا اور متعدد فیڈرز ٹرپ کرنے کی وجہ سے کئی علاقے بجلی سے محروم ہو گئے۔ دوسری جانب پنجاب کے مختلف شہروں گوجرانوالہ، قصور، شیخوپورہ، پتوکی، ساہیوال کامونکی، میانوالی، منڈی بہا الدین، نارووال اور پسرور میں بھی خوب بادل برسے جس سے نشیبی علاقے زیر آب آگئے۔

کریڈٹ: انڈیپنڈنٹ نیوز پاکستان-آئی این پی