وسطی کرم کے علاقے مرغان کوٹکی میں شدت پسندوں نے پولیس کی خالی چیک پوسٹ کو مسمار کرنے کی ویڈیو جاری کر دی۔ پولیس کے مطابق، چند روز قبل اس چیک پوسٹ کو عارضی طور پر خالی کر دیا گیا تھا۔ویڈیو میں شدت پسندوں کو خالی چیک پوسٹ کو مسمار کرتے ہوئے دیکھا جا سکتا ہے، شدت پسندوں نے پاکستانی پرچم کو اتار کر اپنی جھنڈا بھی پہاڑی پر لگا دیا۔پولیس کے مطابق، چیک پوسٹ کو لوٹ کر آگ لگا دی گئی تھی، جس کے بعد اس کے خلاف ایف آئی آر درج کر کے تحقیقات کا آغاز کر دیا گیا ہے۔پولیس نے بتایا کہ چیک پوسٹ لوٹنے اور جلانے کے الزام میں دس سے زائد افراد کو پکڑ لیا گیا ہے۔سماجی رہنما مسرت بنگش نے اس واقعے پر تشویش کا اظہار کرتے ہوئے کہا کہ اورکزئی اور خیبر سے ملحقہ وسطی کرم میں شدت پسندوں کی موجودگی اور ایسے واقعات نے پورے ضلع کی عوام کو یرغمال بنا لیا ہے۔انہوں نے مطالبہ کیا کہ افغانستان اور دیگر علاقوں سے آئے ہوئے شدت پسندوں کو نکال کر محصور عوام کے لیے راستے کھولے جائیں۔

کریڈٹ: انڈیپنڈنٹ نیوز پاکستان-آئی این پی