ضلع کرم میں بلوچستان اور خیبر پختونخوا سے آیا ہوا پشتون قومی امن جرگہ واپس روانہ ہوگیا،جرگہ ممبر ملک نصیر کوکی خیل کے مطابق جرگے نے فریقین کے عمائدین کے ساتھ ایک ہفتہ مذاکرات کیے، ایک فریق نے جرگے سے مذاکرات کے لیے چند روز کی مہلت مانگ لی، چند روز بعد ہم دوبارہ آکر قیام امن کے لیے مزاکراتی عمل شروع کریں گے۔جرگہ ذرائع کا کہنا ہے کہ کوہاٹ میں گرینڈ امن جرگہ کسی نتیجے پر نہیں پہنچ سکا، کوہاٹ میں مذاکراتی عمل جاری رکھا جائے گا۔ دوسری جانب ضلع کرم میں مسافر گاڑیوں پر فائرنگ اور قبائلی جھڑپوں کے باعث آمد و رفت کے راستے 2 ماہ سے بند ہیں، راستوں کی بندش سے لوگ خوراک، تیل اور علاج نہ ملنے کی وجہ سے مشکلات کا شکار ہیں۔اس کے علاوہ گیس ختم ہونے کے باعث تندور اور ہوٹل بند ہونے سے شہریوں کی مشکلات مزید بڑھ گئیں۔مشیر اطلاعات خیبرپختونخوا بیر سٹر سیف نے بتایا کہ وزیراعلی خیبرپختونخوا علی امین گنڈا پور کی ہدایت پر ادویات کی کمی پوری کرنے کی کوشش کی جارہی ہے۔

کریڈٹ : انڈیپنڈنٹ نیوز پاکستان-آئی این پی