کراچی میں ہیوی گاڑیوں کی لاپروائی سے ہونے والے حادثات کا سلسلہ بدستور جاری ہے ، جمشید کوارٹر اور سچل کے علاقوں میں پیش آنے والے دو الگ الگ حادثات میں دو موٹرسائیکل سوار افراد جا ںبحق ہوگئے۔ تفصیل کے مطابق پہلا واقعہ گرومندر کے قریب بلیو ربن بیکری کے نزدیک پیش آیا جہاں رات ساڑھے بارہ بجے کے قریب ایک نامعلوم گاڑی کی ٹکر سے 40 سالہ موٹرسائیکل سوار شدید زخمی ہو گیا۔ زخمی شخص کو فوری طور پر جناح اسپتال منتقل کیا گیا، تاہم منگل اور بدھ کی درمیانی شب وہ دوران علاج دم توڑ گیا۔پولیس کے مطابق متوفی کے پاس ایسی کوئی شناختی دستاویز موجود نہیں تھی جس سے اس کی شناخت ممکن ہو سکے۔ ضابطے کی کارروائی کے بعد لاش کو چھیپا سردخانے میں ورثا کی شناخت کے لیے امانتا رکھوا دیا گیا ہے۔دوسرا واقعہ سچل تھانے کی حدود میں گڈاپ ٹائون کے علاقے سعدی گارڈن کے گیٹ کے قریب پیش آیا، جہاں ایک واٹر ٹینکر کی ٹکر سے 35 سالہ موٹرسائیکل سوار تنویر موقع پر جاں بحق ہو گیا۔ جاں بحق شخص کی لاش کو چھیپا ایمبولینس کے ذریعے پہلے سچل تھانے اور بعد ازاں عباسی شہید اسپتال منتقل کیا گیا۔حادثے کے بعد واٹر ٹینکر کا ڈرائیور موقع سے فرار ہونے میں کامیاب ہو گیا، تاہم پولیس نے ٹینکر کو قبضے میں لے کر تھانے منتقل کر دیا ہے۔

کریڈٹ: انڈیپنڈنٹ نیوز پاکستان-آئی این پی