کراچی کے علاقے منگھو پیر میں واٹر ٹینکر نے موٹر سائیکل سوار کچل دیا، متوفی حافظ ابراہیم کی ستائیسویں شب کو تراویح مکمل ہونا تھی۔تفصیل کے مطابق کراچی میں بیلگام ڈمپراور واٹر ٹینکرز کو روکنے والا کوئی نہیں ، ملیر ہالٹ سانحے کا دکھ ابھی کم بھی نہیں ہوا تھا کہ منگھوپیر میں واٹر ٹینکر نے ایک بائیک سوار کو کچل دیا۔پولیس حکام کا کہنا ہے کہ ڈرائیور ٹینکر چھوڑ کر فرار ہوگیا تاہم ٹینکر تحویل میں لے کر تھانے منتقل کردیا گیا ہے اور فرار ٹینکر ڈرائیور کی گرفتاری کی کوششیں کی جا رہی ہیں۔منگھوپیرٹریفک حادثے میں جاں بحق شخص پیش امام تھا اور متوفی ابراہیم کی ستائیسویں شب کو تراویح میں تکمیل قرآن ہونا تھی۔متوفی حافظ محمد ابراہیم دو بچوں کاباپ اور منگھوپیر کا رہائشی تھا، ٹریفک حادثے کے خلاف علاقہ مکینوں نے نیا ناظم آباد کے قریب احتجاج کیا۔

کریڈٹ: انڈیپنڈنٹ نیوز پاکستان-آئی این پی