کراچی کے نوجوان سے محبت میں دھوکا کھانے والی امریکی خاتون اونیجا اینڈریو رابنسن نے شادی سے انکار پر پہلے ایئرپورٹ اور پھر لڑکے کے گھر کے پاس دھرنا دے دیا، خاتون نے امریکا واپسی کے لیے لڑکے سے ملاقات اور ڈالرز کی ادائیگی کی شرط رکھ دی۔ تفصیل کے مطابق کراچی کے علاقے گارڈن ویسٹ کے رہائشی نوجوان 19 سالہ ندال احمد میمن کی محبت میں گرفتار 33 سالہ امریکی خاتون اونیجا اینڈریو رابنسن گزشتہ رات ایئرپورٹ سے نوجوان کے اپارٹمنٹ پہنچ گئی اور دھرنا دے دیا۔امریکی خاتون اپارٹمنٹ کی پارکنگ میں کرسی ڈال کر بیٹھ گئی، اپارٹمنٹ کی یونین نے واپس جانے کا کہا لیکن خاتون نے انکار کر دیا، امریکی خاتون کی موجودگی کے باعث گارڈن کے مذکورہ اپارٹمنٹ میں لوگوں کو رش لگ گیا۔تاہم 19 سالہ نوجوان اور اس کے اہلخانہ گھر پر تالا ڈال کر کہیں چلے گئے ہیں

جبکہ خاتون واپسی کے لیے لڑکے سے ملاقات اور امریکی ڈالرز کی ادائیگی کا مطالبہ کرتی رہی۔اس سے قبل خاتون کو وطن واپس بھیجنے کے لیے امریکی قونصلیٹ کی دورکنی ٹیم کراچی ایئرپورٹ پہنچی، ٹیم نے خاتون سے بات چیت کی تاکہ اسے امریکا بھیجنے پر آمادہ کیا جاسکے۔تاہم خاتون امریکا واپس جانے سے مسلسل انکار کرتی رہی، امریکی قونصلیٹ کی ٹیم کا کہنا تھا کہ خاتون کو واپس بھیجنے کے لیے زبردستی نہیں کرسکتے۔قبل ازیں، امریکی خاتون کو قطر ایئر ویز کی پرواز کیو آر 611 سے صبح 10 بجیامریکا بھیجنے کی کوشش کی گئی تھی جس پر خاتون نے ایئرپورٹ پر شورشرابہ کیا جس کے بعد اسے پرواز سے آف لوڈ کردیا گیا۔ایئرپورٹ حکام کا کہنا تھا کہ خاتون کسی صورت واپس جانے پر راضی نہیں ہورہی تھی جس سے پرواز 36 منٹ تاخیر کا شکار ہوئی تھی۔

کریڈٹ: انڈیپنڈنٹ نیوز پاکستان-آئی این پی