کراچی میں کورنگی کریک کے علاقے میں لگنے والی پراسرار آگ ایک بار پھر بغیر کسی فائر بریگیڈ کارروائی کے خود ہی بجھ گئی۔ واقعے کے بعد اطراف کے علاقے میں گیس کی تیز بو محسوس کی جا رہی ہے، جس سے مقامی رہائشیوں میں تشویش پائی جاتی ہے۔ یاد رہے کہ چند روز قبل بھی اسی مقام پر آگ لگی تھی جو خود ہی بجھ گئی تھی تاہم بعد ازاں اسے دوبارہ بھڑکا دیا گیا تھا۔ حکام کے مطابق آگ لگنے کی وجوہات تاحال معلوم نہیں ہو سکیں، تاہم گیس کے اخراج اور ممکنہ کیمیکل ریکٹیویٹی کو مدنظر رکھتے ہوئے تحقیقات کا آغاز کر دیا گیا ہے۔ مقامی افراد کا کہنا ہے کہ علاقے میں گیس کی بو مستقل محسوس کی جا رہی ہے۔ محکمہ ماحولیات اور ضلعی انتظامیہ کو واقعے سے آگاہ کر دیا گیا ہے جبکہ شہریوں سے احتیاط برتنے اور علاقے میں غیر ضروری آمدورفت سے گریز کی ہدایت کی گئی ہے۔

کریڈٹ: انڈیپنڈنٹ نیوز پاکستان-آئی این پی