کوئٹہ سمیت بلوچستان کے مختلف علاقوں میں بارش اور برفباری سے سردی میں اضافہ ہوگیا۔ زیارت،کوژک ٹاپ، پرانا چمن، شیلاباغ میں برفباری ہوئی جب کہ کوژک ٹاپ پربرفباری کے باعث چمن کوئٹہ کراچی شاہراہ پر ٹریفک متاثر رہی۔این ایچ اے کی جانب سے ہیوی مشینری سے برف ہٹانے کا کام جاری ہے۔اس کے علاوہ چمن میں گرج چمک کے ساتھ موسلادھار بارش اور طوفانی ہواں سے نشیبی علاقے زیرآب آگئے۔ محکمہ موسمیات کے مطابق قلات اور گردونواح میں 2 انچ سے زائد برفباری ریکارڈ کی گئی، برفباری کی وجہ درجہِ حرارت نقظہ انجماد سے نیچے گرگیا۔چمن میں بالائی پہاڑی علاقوں میں برفباری کا سلسلہ جاری ہے، چمن شہر اور گردونواح میں بارش ،سردی کی شدت میں اضافہ ہوگیا۔ ضلعی انتظامیہ کے مطابق کوژک ٹاپ قومی شاہراہ پر نمک کا چھڑکا کیا جارہا ہے۔بلوچستان میں حالیہ بارشوں اور برفباری کی صورتحال باعث محکمہ پی ڈی ایم اے نے چھٹیاں منسوخ کردیں۔ڈائریکٹرجنرل پی ڈی ایم اے کے مطابق چھٹیاں منسوخ کرنے کا فیصلہ برفباری اور بارش سے متاثرہ علاقوں میں جاری امدادی کاروائیوں کے پیش نظرکیا، تمام افسران اور عملہ بلا تعطل اپنی ڈیوٹیاں سر انجام دے رہے ہیں۔

برفباری سے متاثرہ علاقوں کی صورتحال کا لمحہ بہ لمحہ جائزہ لے رہے ہیں۔ادھر محکمہ موسمیات نے آ ئندہ24گھنٹوں میں بالائی خیبر پختونخوا، گلگت بلتستان اور کشمیر میں تیزبارش اور پہاڑوں پر برفباری کی پیشگوئی کی ہے جب کہ اسلام آباد، پنجاب اور سندھ میں بھی وقفے وقفے سے بارش ہو سکتی ہے۔ نیشنل ڈیزاسٹر مینجمنٹ اتھارٹی نے شمالی علاقہ جات میں بارش اور برفباری کے امکان کی وجہ سے طغیانی کا خدشے کا الرٹ جاری کردیا۔ مغربی سسٹم کے زیر اثر مری میں بارش کے ساتھ 12 سے 20 انچ تک برفباری متوقع ہے جس کے حوالے سے پنجاب حکومت نے اہم ہدایات بھی جاری کر دیں۔صوبائی وزیر مواصلات ملک صہیب احمد بھرتھ انتظامات کا جائزہ لینے مری پہنچے، صوبائی وزیر نے ڈسٹرکٹ ایڈمنسٹریشن کے اجلاس کی صدارت کی۔ برف باری، روڈ کلیئرنگ اور لینڈ سلائیڈنگ سے نمٹنے کے انتظامات پر بریفنگ دی گئی۔بریفنگ میں بتایا گیا کہ مری میں برف باری اور بارش کی پیش گوئی ہے، 12 سے 20 انچ برف پڑنے کا امکان ظاہر کیا گیا ہے۔صوبائی وزیر مواصلات نے ہدایت کی کہ حساس شاہراہیں اور پوائنٹس کی نشاندہی مکمل کی جائے، مری میں داخل ہونے والی گاڑیوں کی مسلسل مانیٹرنگ کی جائے۔

ملک صہیب احمد بھرتھ نے ہدایت دی کہ کسی بھی ہنگامی صورتحال میں فوری رسپانس یقینی بنایا جائے گا، محکمہ موسمیات سے مکمل رابطہ رکھا جائے اور بروقت اپ ڈیٹس لی جائیں۔صوبائی وزیر نے مری کی مختلف شاہراہوں کا معائنہ کرنے کے ساتھ سالٹ کیمپس اور ٹورسٹ فیسلیٹیشن سینٹرز کا دورہ کیا۔ میکنیکل ونگ کی برف ہٹانے اور روڈ کلیئر کرنے والی مشینری کا جائزہ لیا گیا۔انہوں نے کہا کہ پنجاب حکومت سیاحوں اور مقامی آبادی کو سہولیات کی فراہمی کے لیے متحرک ہے، برف باری کے طوفان سے نمٹنے کے لیے جامع پالیسی تشکیل دی جا رہی ہے۔ ہائی وے ڈیپارٹمنٹ، ڈسٹرکٹ ایڈمنسٹریشن، ٹریفک پولیس، ریسکیو 1122 اور دیگر ادارے مکمل رابطہ رکھیں۔صوبائی وزیر نے کہا کہ نمک کے بیگز کی وافر مقدار اسٹور رومز میں موجود ہے، مری میں 13 ٹورسٹ فیسلیٹیشن سینٹرز مکمل طور پر فعال ہیں۔ڈی سی مری، اسسٹنٹ کمشنر، محکمہ ہائی وئے اور میکینکل ونگ کے افسران بھی اس موقع پر موجود تھے۔ ادھر محکمہ موسمیات کے مطابق کراچی میں آئندہ24گھنٹوں میں تیز ہوائوں اورگرج چمک کے ساتھ وقفے وقفے سے بارش متوقع ہے، اس دوران معتدل شدت کی بارش ہوسکتی ہے جب کہ آج ( جمعہ )سے سر دی کی شدت میں اضافے کا امکان ہے۔محکمہ موسمیات کے مطابق شہر میں کم سے کم درجہ حرارت 7 ڈگری سینٹی گریڈ تک رہنے کا امکان ہے جب کہ زیادہ سے زیادہ درجہ حرارت 25 ڈگری سینٹی گریڈ تک جاسکتا ہے۔

کریڈٹ: انڈیپنڈنٹ نیوز پاکستان-آئی این پی