کینالز کی تعمیر کے خلاف سکھر میں وکلا کا دھر نا 11 ویں روز میں داخل ہوگیا ،گڈز ٹرانسپورٹ مکمل بند اور معاشی نقصان سے تاجر اور ٹرانسپورٹرز پریشان ہو گئے ہیں جبکہ ترجمان سندھ حکومت اور میئر سکھر ارسلان اسلام شیخ نے سندھ کے وکلا سے دھرنا ختم کرنے کی اپیل کردی۔تفصیل کے مطابق کینالز کی تعمیر کے خلاف سکھر میں وکلا کا دھر ناپیر کو 11 ویں روز بھی جاری رہا ، گڈز ٹرانسپورٹ مکمل بند ہے، اور معاشی نقصان سے تاجر اور ٹرانسپورٹرز پریشان ہو گئے ہیں، کیوں کہ کاروبار ٹھپ ہو گیا ہے۔ رپورٹ کے مطابق ببرلو بائی پاس پر وکلا کے دھرنے کے باعث قومی شاہراہ پر ملک کے مختلف علاقوں کی جانب سامان کی ترسیل کا نظام مکمل طور پر مفلوج ہو چکا ہے، جس کی وجہ سے گڈز ٹرانسپورٹرز اور مکینک سمیت مختلف کاروبار کرنے والے افراد کو مشکلات کا سامنا ہے۔ قومی شاہراہ کی بندش کا براہِ راست اثر ملک کی معیشت پر پڑ رہا ہے، بندرگاہ پر آنے والا درآمدی سامان اندرون ملک منتقل نہیں ہو رہا، جب کہ برآمدی سامان بھی مقررہ وقت پر بندرگاہ تک نہیں پہنچ رہا، اس تاخیر سے عالمی منڈی میں پاکستانی برآمدات کی ساکھ متاثر ہونے کا خدشہ ہے۔شدید گرمی میں سڑک پر مال بردار گاڑیاں کئی دنوں سے بند پڑی ہیں، جن میں موجود اشیا خراب ہونا شروع ہو گئی ہیں، جب کہ گرمی اور دھوپ کی شدت کے باعث گاڑیوں کے ٹائروں کو بھی نقصان پہنچ رہا ہے۔

قومی شاھراہ پر گاڑیوں کا پہیا چلنے سے ہزاروں افراد کے گھروں کا چولھا جلتا ہے، دھرنے کی وجہ سے چھوٹے کاروبار سے منسلک افراد کو بھی مشکلات کا سامنا کرنا پڑ رہا ہے۔ دوسری جانب ترجمان سندھ حکومت بیرسٹر ارسلان اسلام شیخ نے وکلاسیدھرناختم کرنیکی اپیل کرتے ہوئے کہا کہ وکلابرادری دھرنوں کو فی الفور ختم کرے، راستے کھولے، راستے بلاک ہونے سے تجارت متاثر ہو رہی ہے، معیشت کو خطرات لاحق ہیں۔ترجمان کا کہنا تھا کہ مویشی راستوں میں پھنسیہوئیہیں،ان کی جانوں کوخطرہ ہے، ادویات اور ایندھن کی سپلائی رکی ہوئی ہے، ہرقسم کی زرعی اجناس اور تجارت رکی ہوئی ہے۔بیرسٹر ارسلان نے کہا کہ وہ چیز ڈی نوٹیفائی ہوتی ہے جس کانوٹیفکیشن جاری ہو، کینالوں کاکبھی نوٹیفکیشن جاری ہی نہیں ہوا، کینالوں کی ڈی نوٹیفکیشن کا مطالبہ کیا جا رہا ہے۔انھوں نے بتایا کہ ایک تجویز تھی،جوایکنک اورسی سی آئی جیسے متعلقہ فورمز سے منظور ہی نہیں ہوئی ، کینالوں کا مسئلہ حل ہو چکا ہے، چیئرمین بلاول بھٹو نے جمہوری طریقے سے سندھ کا مقدمہ لڑا، بات واضح ہو گئی ہے کہ اتفاق رائے کے بغیر یہ کینالز نہیں بنیں گے۔ترجمان سندھ حکومت کا کہنا تھا کہ اس وقت مودی پاکستان کو دھمکیاں دے رہا ہے، سرحدوں پر مسائل کا سامنا ہے، ہمیں مل کر پاکستان کی جنگ لڑنی ہوگی۔انھوں نے مزید کہا کہ کینال منسوخی کی رسمی کارروائی سی سی آئی اجلاس میں پوری ہو جائے گی۔

کریڈٹ: انڈیپنڈنٹ نیوز پاکستان-آئی این پی