یونان کے قریب بحیرہ روم میں کشتی ڈوبنے سے پاکستانیوں کے جاں بحق ہونے پر ملک بھر میں یوم سوگ منایا گیا ،قومی پرچم سرنگوں رہا ، جاں بحق افراد کیلئے خصوصی دعا کی گئی ۔ پیر کو وزیراعظم شہباز شریف کی ہدایت پر 14 جون کو یونان میں کشتی الٹنے کے حادثے پر قومی سوگ منایا گیا ، اس سلسلے میں قومی پرچم سرنگوں رہا ، جاں بحق ہونے والوں کیلئے خصوصی دعا کی گئی ۔دوسری طرف واقعے کی تحقیقات کے لئے 4 رکنی اعلی سطح کی کمیٹی بھی تشکیل دے دی، اعلی سطح کی کمیٹی یونان میں کشتی ڈوبنے کے تمام حقائق جمع کرے گی، کمیٹی کی رپورٹ کی روشنی میں مزید کارروائی عمل میں لائی جائے گی۔ کمیٹی ایک ہفتے میں رپورٹ وزیراعظم شہبازشریف کو پیش کرے گی، واقعے میں ملوث ملزمان، کمپنیوں اورایجنٹوں کوسخت سزا کیلئے قانون سازی ہوگی۔ عالمی سطح پرمسئلے کے حل کیلئے تعاون اور اشتراک عمل کی تجاویزدی جائیں گی۔ انسانی اسمگلنگ کے پہلو کی تحقیق ہوگی اورذمہ داروں کا تعین کیا جائے گا۔ کمیٹی کے چیئرمین ڈی جی نیشنل پولیس بیورو احسان صادق ہوں گے، وزارت خارجہ کے ایڈیشنل سیکرٹری (افریقہ )جاوید احمد عمرانی، آزاد جموں و کشمیر پونچھ ریجن کے ڈی آئی جی سردار ظہیر احمد اور وزارت داخلہ کے جوائنٹ سیکرٹری (ایف آئی اے)فیصل نصیر بھی کمیٹی میں شامل ہیں۔

کریڈٹ: انڈیپنڈنٹ نیوز پاکستان-آئی این پی