اینٹی نارکوٹکس فورس(اے این ایف) نے گزشتہ 24گھنٹوں کے دوران تعلیمی اداروں میں منشیات فراہمی کے خلاف ملک گیر 5 مختلف کارروائیوں4 ملزمان کوگرفتار کر لیا جبکہ 94 لاکھ روپے مالیت کی 44 کلوگرام منشیات برآمدکر لی گئی ۔اے این ایف ہیڈکوارٹر راولپنڈی سے جاری بیان کے مطابق رنگ روڈ پشاور پر حیات آباد ٹول پلازہ کے قریب ملزم سے 1500 ایکسٹیسی گولیاں برآمدکی گئیں ۔ایبٹ آباد میں مری روڈ پر موٹر سائیکل سوار ملزم کے قبضے سے 500 گرام چرس برآمدکی گئی ۔ٹنڈو جام حیدرآباد میں یونیورسٹی کے قریب موٹر سائیکل سوار ملزم سے 7 کلوگرام چرس برآمد کی گئی ۔ترجمان نے بتایاکہ گرفتار ملزمان نے تعلیمی اداروں کے طلبا کو منشیات فروخت کرنے کا اعتراف کیاہے ۔دیگر کارروائیوں میں موٹروے ٹول پلازہ اسلام آباد کے قریب گاڑی سے 12 کلوگرام چرس برآمدکرکے ایک ملزم گرفتارکیاگیا۔اورکزئی میں افغان کیمپ کے قریب لاوارث موٹر سائیکل سے 24 کلوگرام چرس برآمدکی گئی ۔ترجمان اے این ایف نے بتایاکہ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔

کریڈٹ: انڈیپنڈنٹ نیوز پاکستان-آئی این پی