گورنر خیبر پختونخوا فیصل کریم کنڈی سے ڈائریکٹر کمرشل آڈٹ سرفراز حسین انصاری نے ملاقات کی اور پبلک سیکٹر انٹرپرائزز سے متعلق آڈٹ رپورٹ 2024-25 پیش کی ۔ گورنر ہائوس سے جاری بیان کے مطابق ڈائریکٹر کمرشل آڈٹ نے گورنر کو صوبے میں پبلک سیکٹر اداروں سے متعلق آڈٹ رپورٹ 2024-25 پیش کی۔آڈٹ رپورٹ میں فارسٹ ڈیویلپمنٹ کارپوریشن، سمال انڈسٹریز ڈیویلپمنٹ بورڈ، کے پی ایزمک اور ٹیوٹا خیبر پختونخوا کے ادارے شامل ہیں۔آڈیٹر جنرل آف پاکستان کی جانب سے پیش کی جانے والی آڈٹ رپورٹ میں مذکورہ اداروں کے مالی اخراجات میں شفافیت کا جائزہ لیا گیا۔گورنر کو 12 اداروں سے متعلق آڈٹ رپورٹس میں 700 کے قریب آڈٹ پیراز سے متعلق پبلک اکائونٹس کمیٹی کے اجلاس کے تعطل بارے بھی بتایا گیا۔ فیصل کریم کنڈی نے کہا کہ مختلف محکموں میں مالی نظم و ضبط برقرار رکھنے کیلئے آڈٹ رپورٹس کی سفارشات پر من و عن عملدرآمد ہونا چاہئے، مالی امور میں شفافیت کے بغیر اقتصادی و ادارہ جاتی مقاصد حاصل نہیں کئے جا سکتے۔

کریڈٹ: انڈیپنڈنٹ نیوز پاکستان-آئی این پی