گوادر نارتھ فری زون کو نیشنل گرڈ سسٹم سے منسلک کرنے کے بعد 10 میگاواٹ بجلی کی فروہمی شروع کر دی گئی ہے، دوسرے مرحلے میں گوادر نارتھ فری زون اور گوادر پورٹ کو 5 میگاواٹ بجلی فراہم کی جائے گی۔گوادر پرو کے مطابق گوادر پورٹ اتھارٹی نے ایک سال میں پورا کام مکمل کیا۔ کوئٹہ الیکٹرک پاور سپلائی کمپنی (کیسکو)اور چائنا اوورسیز پورٹس ہولڈنگ کمپنی (سی او پی ایچ سی) نے فزیبلٹی اسٹڈیز کیں۔ کراچی سے تعلق رکھنے والی کمپنی سگما نے گوادر نارتھ فری زون میں ڈسٹری بیوشن نیٹ ورک تعمیر کیا۔ گوادر پرو کے مطابق ڈیپ سی پورٹ گرڈ اسٹیشن سے تقریبا 300 میٹر طویل زیر زمین بجلی کی تاریں بچھائی گئی ہیں جس میں حال ہی میں نارتھ فری زون کے داخلی راستے پر ایک ذیلی اسٹیشن تعمیر کیا گیا ہے۔ سب اسٹیشن میں کنٹرول پینل ، ایچ ٹی روم اور الماریاں ہیں جو زون میں فیکٹریوں کو بجلی کی فراہمی کا انتظام کرتی ہیں۔ گوادر پرو کے مطابق سب اسٹیشن سے 5 کلومیٹر طویل 132 کے وی ڈسٹری بیوشن لائن بچھائی گئی جس میں 5 میگاواٹ کے دو فیڈرز تھے۔ نارتھ فری زون کے اندر فیکٹریوں کے احاطے میں کیلئے جہاں ہان گینگ اور ایگوین سمیت کمپنیاں کام کر رہی ہیں، ان کی ضروریات کے مطابق بجلی کی مسلسل فراہمی کے لئے سٹیپ ڈاون ٹرانسفارمر نصب کیے گئے ہیں ۔

اب گوادر نارتھ فری زون کو تین ذرائع سے گوادر پورٹ کے واحد گرڈ اسٹیشن سے منسلک کر دیا گیا ہے۔ "ایک ذریعہ کوئٹہ کا نیشنل گرڈ اسٹیشن ہے۔ دوسرا ذریعہ ایران کی سرحد کا گبد-ریمدان ہے۔ تیسرا ذریعہ ایران کی ایک اور سرحد کا ناگ بیسیما سیکشن ہے۔ گوادر پرو کے مطابق ڈیپ سی پورٹ کا واحد گرڈ اسٹیشن 2019 میں تین فیڈرز کے ذریعے خصوصی طور پر گوادر پورٹ اور فری زون کے لیے قائم کیا گیا تھا۔ چونکہ کیسکو کے پاس بجلی ناکافی تھی ، لہذا گرڈ اسٹیشن کو ماضی میں مہنگے فوسل ایندھن کا استعمال کرتے ہوئے تھرمل پاور کی پیداوار کے لئے ڈیزل جنریٹرز پر انحصار کرنا پڑا۔ گوادر پرو کے مطابق گوادر نارتھ فری زون کے فعال ہونے کے بعد 8.5 میگاواٹ کا ڈیزل جنریٹر بند کردیا گیا ہے جس سے کروڑوں روپے کی بچت ہوئی ہے۔ سی او پی ایچ سی حکام نے بتایا کہ حقیقت میں 8.5 میگاواٹ ڈیزل جنریٹر کے ذریعے پیدا کی جانے والی بجلی کی قیمت تقریبا 90 روپے فی یونٹ ہے۔ تاہم گوادر نارتھ فری زون میں 10 میگاواٹ بجلی کی دستیابی کے بعد بجلی کی قیمت تقریبا 55 روپے فی یونٹ ہوگی۔ گوادر پرو کے مطابق اس کا مطلب ہے کہ سرمایہ کاروں اور فیکٹری مالکان کو فی یونٹ تقریبا 35 روپے کی بچت ہوگی۔ سی او پی ایچ سی کے عہدیدار نے کہا کہ اس سے نہ صرف موجودہ کاروباری اداروں بلکہ ممکنہ سرمایہ کاروں کے لئے بھی مالیاتی لیورج اور پیداوار کی نمو پر براہ راست اثر پڑے گا۔

کریڈٹ: انڈیپنڈنٹ نیوز پاکستان-آئی این پی