دفتر خارجہ نے کہا ہے کہ بھارت نے یکطرفہ طور پر سندھ طاس معاہدے کو معطل کیا،سندھ طاس معاہدے کی خلاف ورزی بھارت کا غیرذمہ دارانہ اقدام ہے،پانی کی بندش کا اقدام جنگ کے مترادف ہو گا ، بھرپور جواب دیا جائے گا،پاکستان کی مسلح افواج ملکی سلامتی اور دفاع کیلئے مکمل طور پر تیار ہیں۔ ترجمان دفتر خارجہ شفقت علی خان نے ہفتہ وار میڈیا بریفنگ میں کہا کہ پاکستان انڈس واٹرز ٹریٹی کو معطل کرنے کے بھارتی فیصلے کو سختی سے مسترد کرتا ہے۔ پانی پاکستان کے لیے زندگی و موت کا مسئلہ ہے اگر بھارت نے پانی روکنے یا رخ موڑنے کی کوشش کی تو یہ جنگی اقدام تصور ہوگا۔ترجمان کے مطابق ہم سندھ طاس معاہدے پر اپنی پالیسی کا اعادہ کرتے ہیں، یہ معاہدہ 250 ملین افراد کی زندگی کا معاملہ ہے۔ شفقت علی خان نے کہا کہ بھارت کے غیر ذمہ دارانہ رویے کے پیش نظر پاکستان تمام دو طرفہ معاہدے بشمول شملہ معاہدہ، معطل کرنے کا حق محفوظ رکھتا ہے۔ قومی سلامتی کمیٹی کا اجلاس ہوا جس میں اہم فیصلے ہوئے، قومی سلامتی کمیٹی کے اجلاس میں پاکستان نے بھارت کو جوابات دیئے۔

ان کا کہنا تھا کہ سندھ طاس معاہدے کی خلاف ورزی ہندوستان کا غیر ذمہ دارانہ اقدام ہے، بھارت نے یکطرفہ طور پر سندھ طاس معاہدے کو معطل کیا، بھارت کے یکطرفہ رویے سے علاقائی امن و استحکام کو نقصان کا اندیشہ ہے، بھارتی اقدامات نے دوقومی نظریے پر مہر ثبت کر دی۔انہوں نے کہا کہ پاکستان کی مسلح افواج ملکی سلامتی اور دفاع کیلئے مکمل طور پر تیار ہیں۔ اجلاس میں عالمی برادری کو بھارت کے بین الاقوامی قوانین کی خلاف ورزی، بیرون ملک قتل کی وارداتوں اور دہشت گردی کے واقعات کا نوٹس لینے کا مطالبہ کیا گیا۔ترجمان دفترخارجہ کا کہنا تھا کہ واہگہ بارڈر پر ہر قسم کی آمدورفت بند کر دی گئی ہے،ترجمان نے کہا کہ بھارتی نیول، ایئر اور ڈیفنس ایڈوائزرز کو ناپسندیدہ شخصیات قرار دے کر 30 اپریل تک ملک چھوڑنے کی ہدایت کی گئی ہے۔ بھارتی ہائی کمیشن کے عملے کی تعداد 30 افراد تک محدود کرنے کا فیصلہ کیا گیا ہے۔صرف 30 اپریل 2025 تک واپس جانے والوں کو اجازت ہوگی۔

سارک ویزا اسکیم کے تحت بھارتی شہریوں کے تمام ویزے منسوخ کر دیے گئے، صرف سکھ یاتری مستثنا ہوں گے۔ پاکستان کی فضائی حدود بھارتی پروازوں کیلئے بند ہے ۔شفقت علی خان نے کہا کہ وزیراعظم شہبازشریف نے حالیہ دورہ ترکیہ میں ترک قیادت کے ساتھ مفید بات چیت کی، متحدہ عرب امارات کے نائب وزیراعظم نے پاکستان کا دورہ کیا، فریقین نے دوطرفہ تعلقات مضبوط بنانے اور مختلف شعبوں میں تعاون بڑھانے پر اتفاق کیا۔ملاقاتوں میں خطے اور عالمی منظر نامے پر گفتگو ہوئیں، کلچرل کوآپریشن پر ایم او یوز دستخط ہوئیں۔ روانڈا کے وزیر خارجہ نے بھی پاکستان کا دورہ کیا ۔پاکستان اور روانڈا کے درمیان مختلف شعبوں میں تعاون کے ایم اویوز پر دستخط کئے گئے۔انہوں نے کہا کہ نائب وزیراعظم اسحاق ڈار نے افغانستان کا اہم دورہ کیا، اسحاق ڈار نے ازبک ہم منصب سے ٹیلی فونک رابطے کیا جس میں دوطرفہ تعلقات پر بات چیت کی، اسحاق ڈار نے ایرانی وزیر خارجہ سے بھی ٹیلی فونک رابطے میں دوطرفہ امور پر تبادلہ خیال کیا۔ ترجمان نے کہا کہ پاکستان نے پاپ فرانسیس کی وفات پر دلی افسوس کا اظہار کیا ہے، پاکستان ان کے شاندار خدمات کو سراہتا ہے۔

کریڈٹ: انڈیپنڈنٹ نیوز پاکستان-آئی این پی