سابق وزیراعظم بانی پاکستان تحریک انصاف عمران خان اور ان کی اہلیہ بشری بی بی کے خلاف 190 ملین پائونڈ ریفرنس کا فیصلہ ایک بار پھر موخرکر دیا گیا اب جمعہ 17جنوری کو سنایا جائیگا۔عدالت نے فیصلہ سنانے کی نئی تاریخ 17 جنوری دے دی۔ احتساب عدالت کے جج ناصر جاوید رانا نے 190 ملین پاونڈ ریفرنس کیس کا فیصلہ پیر کے روز اڈیالہ جیل میں سنانا تھا۔واضح رہے کہ 190 ملین پاونڈ ریفرنس کا محفوظ فیصلہ سنانے کے لیے سماعت 2 بار موخر ہو چکی ہے، جس کے بعد تیسری بار اس کی تاریخ 13 جنوری مقرر کی گئی تھی۔عدالت نے پہلے 23 دسمبر، پھر 6 جنوری اور پھر 13 جنوری کی تاریخ مقرر کی۔190 ملین پاونڈ ریفرنس کا ٹرائل ایک سال تک اڈیالہ جیل میں جاری رہا۔نیب نے 35 گواہان کے بیانات قلم بند کرائے، وکلائے صفائی نے تمام گواہان پر جرح مکمل کی۔اہم گواہان میں سابق وزیرِ اعلیٰ کے پی پرویز خٹک اور سابق پرنسپل سیکریٹری اعظم خان شامل تھے۔ان کے علاوہ سابق وفاقی وزیر زبیدہ جلال اور القادر یونیورسٹی کے چیف فنانشل افسر بھی گواہان میں شامل تھے۔

کریڈٹ : انڈیپنڈنٹ نیوز پاکستان-آئی این پی