محکمہ موسمیات نے آئندہ 24گھنٹوں میں اسلام آباد سمیت مختلف علاقوں میں گرج چمک کے ساتھ بارش کی پیشگوئی کی ہے ۔محکمہ موسمیات کے مطابق ملک کے بیشتر علاقوں میں موسم خشک اور مطلع جزوی ابرآلود رہنے کی توقع ہے۔ اسلام آباد اور گرد و نواح میں مطلع جزوی ابر آلود رہنے کے علاوہ تیز ہوائوں اور گرج چمک کے ساتھ بارش کی پیشگوئی کی گئی ہے۔پنجاب میں راولپنڈی، اٹک، جہلم، چکوال، منڈی بہاالدین، سرگودھا، میانوالی، خوشاب، گجرات، سیالکوٹ، نارووال، لاہور،گوجرانوالہ، فیصل آباد اور شیخوپورہ میں چند مقاما ت پر تیز ہوائوں اور گرج چمک کے ساتھ بارش کا امکان ہے۔ مری، گلیات اور گرد و نوا ح میں مطلع ابر آلود رہنے کے علاوہ بارش کی توقع ہے۔چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، نوشہرہ، صوابی، مردان، بونیر، پشاور، کوہاٹ، کرک، بنوں، باجوڑ، مہمند، کرم، خیبر اور وزیرستان میں تیز ہواں اور گرج چمک کے ساتھ بارش اور پہاڑوں پر برفباری ہونے کی توقع ہے۔ کشمیر اور گلگت بلتستان میں مطلع ابر آلود رہنے کے علاوہ بارش اور پہاڑوں پر برفباری کا امکان ظاہر کیا گیا ہے۔

آزاد کشمیر کی وادی نیلم میں وقفے وقفے سے بارش اور برف باری جاری رہی۔ادھر سندھ کے کے بیشتر اضلاع میں موسم خشک جبکہ زیریں اضلاع میں گرم رہنے کا امکان ظاہرکیا گیا ہے۔ محکمہ موسمیات کے مطابق کراچی میں وقفے وقفے سے تیزہوائیں چل سکتی ہیں، جبکہ زیادہ سیزیادہ درجہ حرارت 37 تا 38 ڈگری سینٹی گریڈتک رہنے کاامکان ہے۔شہر قائد میں کم سیکم درجہ حرارت 23 ڈگری سینٹی گریڈریکارڈ کیا گیا، جبکہ ہوامیں نمی کا تناسب 78 فیصد ہے۔محکمہ موسمیات نے بتایا کہ شہر قائد میں اس وقت 8 کلو میٹر فی گھنٹہ کی رفتار سے جنوب مغربی ہوا چل رہی ہے، شہر کا مطلع صاف رہے گا تاہم بارش کا کوئی امکان نہیں ہے۔ بلوچستان میں بیشتر اضلاع میں موسم خشک اور شمالی اضلاع میں مطلع جزوی ابر آلود رہنے کی توقع ہے۔کوئٹہ، نوشکی، ژوب میں بارش سے موسم سرد ہوگیا، خیبرپختونخوا کے مختلف علاقوں میں بھی بادل برسنے کے باعث سردی کی شدت میں اضافہ ہوگیا، شگر میں بارش اور برفباری کا سلسلہ جاری رہا۔بالائی اور پہاڑی علاقوں میں لینڈ سلائیڈنگ کا خطرہ بڑھ گیا۔

کریڈٹ: انڈیپنڈنٹ نیوز پاکستان-آئی این پی