دفاعی تجزیہ کاروں کی ٹی وی پروگرامز میں شرکت کو آئی ایس پی آر کی اجازت سے مشروط کرنے کا پیمرا کا نوٹیفکیشن معطل کر دیا گیا۔اسلام آباد ہائی کورٹ کے جسٹس بابر ستار نے کرنل ریٹائرڈ انعام الرحیم ایڈووکیٹ کی درخواست پر سماعت کا تحریری حکم نامہ جاری کر دیا۔حکم نامے میں کہا گیا ہے کہ دفاعی تجزیہ کاروں کی ٹی وی پروگرامز میں شرکت آئی ایس پی آر کی اجازت سے مشروط کرنے کا نوٹیفکیشن اس کیس کے فیصلے تک معطل رہے گا۔نوٹیفکیشن کے مطابق صرف آرمڈ فورسز کے ریٹائرڈ افسران ہی ٹی وی پروگرامز میں شرکت کر سکتے تھے، پیمرا نے ریٹائرڈ افسران کی ٹی وی پروگرامز میں شرکت کو آئی ایس پی آر کی اجازت سے مشروط کیا تھا۔17 دسمبر کو پیمرا کی جانب سے وکیل عدالتی سماعت میں پیش نہیں ہوئے اور معاون وکیل نے سینیئر وکیل کی طبیعت ٹھیک نہ ہونے پر التوا کی استدعا کی۔عدالت نے آرڈر میں لکھا کہ اب تک کی عدالتی سماعت میں دیے گئے دلائل کی بنیاد پر پیمرا کا نوٹیفکیشن معطل کیا جاتا ہے جو کیس پر فیصلے تک معطل رہے گا۔کیس کی آئندہ سماعت 11 فروری کو ہو گی۔

کریڈٹ : انڈیپنڈنٹ نیوز پاکستان-آئی این پی