گورنر سندھ کامران ٹیسوری نے کہا ہے کہ اوورسیز پاکستانیوں نے ریکارڈ زرمبادلہ بھیج کر ملکی معیشت کو نئی طاقت دی، پاکستانی و کشمیری کمیونٹی پاکستان کے ایمبیسیڈر ہیں، قانون کی پاسداری کریں اور اپنی شناخت کو فخر بنائیں، سوشل میڈیا پر بغیر تصدیق خبر پھیلانا نہ مہذب معاشرے کی نشانی ہے اور نہ ہی اسلام اس کی اجازت دیتا ہے۔ان خیالا ت کااظہار انہوں نے اپنے دورہ برطانیہ میں برمنگھم میں اوورسیز پاکستانیوں سے خطاب کرتے ہوئے کیا۔گورنر سندھ نے اوورسیز پاکستانیوں کیلئے گورنر انیشی ایٹو کے تحت خصوصی مراکز کھولنے کا اعلان کرتے ہوئے کہا کہ سندھ میں کوئی مسئلہ ہو تو گورنر انیشی ایٹو کے تحت قائم مراکز مدد کریں گے، اوورسیز پاکستانیوں نے ریکارڈ زرمبادلہ بھیج کر ملکی معیشت کو نئی طاقت دی، برطانیہ میں مقیم پاکستانیوں اور کشمیریوں کا آبائی وطن کی معیشت میں اہم کردار ہے۔کامران ٹیسوری کا مزید کہنا تھا کہ پاکستان کے عام شہری برطانیہ میں اعلی ترین سیاسی عہدوں پر پہنچے ہیں، بس ڈرائیورز کے بچوں نے رکن پارلیمنٹ بن کر مثالیں قائم کی ہیں، صادق خان جیسے عام شہری کا لندن میں تین بار مسلسل میئر بننا کمال ہے، برطانیہ میں آباد پاکستانیوں نے وطن کی بہت خدمت کی، میں ان کی خدمت کیلئے حاضر ہوں۔

کریڈٹ: انڈیپنڈنٹ نیوز پاکستان-آئی این پی