کڑی سیدال میں منشیات فروشوں کے خلاف پولیس مقابلے کے دوران فائرنگ سے 2 سالہ بچہ شایان جاں بحق جبکہ ایک کمسن بچی شدید زخمی ہوگئی۔ پولیس کے مطابق منشیات فروشوں کے ٹھکانے پر چھاپا مارا تو ملزمان نے دیکھتے ہی فائرنگ کردی۔ اس دوران فائرنگ کے تبادلے میں 2 سالہ بچہ جاں بحق اور ایک بچی زخمی ہوگئی۔ منشیات فروش صنوبر اور اس کے ساتھی کئی مقدمات میں مطلوب ہیں۔ جاں بحق ہونے والا 2 سالہ بچہ اور زخمی بچی منشیات فروشوں کے پڑوسی ہیں۔ فائرنگ کے تبادلے کے دوران گولی دروازے سے پار ہوکر ماں کی گود میں سوئے 2 سالہ شایان کو لگی۔ پولیس کے مطابق یہ بتانا قبل از وقت ہوگا کہ بچے کو لگنے والی گولی پولیس کی تھی یا ملزمان کی۔ واقعے کے بعد جاں بحق بچے کی لاش اور زخمی بچی کو اسپتال منتقل کردیا گیا ہے۔پولیس کا منشیات فروشوں کی تلاش کے لیے سرچ آپریشن جاری ہے جب کہ فائرنگ کے واقعے میں بچے کے جاں بحق اور زخمی ہونے کی تحقیقات شروع کردی گئی ہے۔

کریڈٹ: انڈیپنڈنٹ نیوز پاکستان-آئی این پی