کراچی ائیرپورٹ پر ایک افسر کو بطور انچارج سیوریج (بیت الخلاوں کی صفائی) اور چوہوں کو پکڑنے کی ڈیوٹی پر نامزد کردیا گیا ۔میڈیا رپورٹ کے مطابق افسر اس بات کا بھی پابند ہوگا کہ ہر گھنٹے کی دستخط شدہ صفائی رپورٹ ڈپٹی ڈائریکٹر کو پیش کرے ،یہ انتہائی حیرت انگیز آرڈر ڈپٹی ڈائریکٹر امیگریشن شہزاد اکبر نے جاری کیا ہے۔ ڈائریکٹر کراچی منتظر مہدی نے اسسٹنٹ سب انسپکٹر منور مہدی کو کراچی ائیرپورٹ پر تعینات کیا، ڈپٹی ڈائریکٹر نے ایک نئے عہدے کی بنیاد رکھی اور اس کو ایڈمن انچارج بنا دیا۔ اس کے فرائض میں امیگریشن میں موجود سیوریج یعنی تمام بیت الخلا کی صفائی ستھرائی کی سپر ویژن اور اس کی ہر ایک گھنٹے بعد اپنے دستخط سے رپورٹ پیش کرنا ضروری ہوگا۔

اس کے فرائض میں یہ بھی شامل کیا گیا ہے کہ وہ امیگریشن اور ڈپٹی ڈائریکٹر آفس میں جو چوہے "تخریب کاری" کرتے ہیں وہ کس بیت الخلا اور کس سیوریج کی لائنوں کے ذریعے اپنا سفر کرتے ہیں اس کی بھی نشاندہی کرنا شامل ہے۔ مذکورہ آرڈر سے ایف آئی اے افسران میں سخت بے چینی اور بد دلی پھیلی ہوئی ہے اور آف لوڈنگ کے غیر مبہم زبانی احکامات اور محکمانہ کارروائیوں کے شکار ایف آئی اے افسران اس غیر پیشہ ورانہ آرڈر کو اپنی مزید تذلیل سے تعبیر کر رہے ہیں۔

کریڈٹ: انڈیپنڈنٹ نیوز پاکستان-آئی این پی