ترجمان ایم کیو ایم پاکستان اور وفاقی وزیر امین الحق نے کہا ہے کہ پی ٹی آئی کے الزامات انتہائی بیوقوفانہ ہیں، عمران خان نے ہمارے ووٹوں پر ساڑھے تین سال حکومت کی، وہ ہمارا شکریہ ادا کریں۔ نجی ٹی وی سے خصوصی گفتگو کرتے ہوئے متحدہ قومی موومنٹ کے ترجمان اور وفاقی وزیر امین الحق کا کہنا تھا کہ پیپلز پارٹی کے مذاکرات چل رہے ہیں، حلقہ بندیوں پر بات ہورہی ہے، ہمارا سب سے بڑا مطالبہ حلقہ بندیاں ہیں، وفاق میں قانون سازی سے حلقہ بندیاں ہوگئیں تو کراچی میں کیوں نہیں۔ امین الحق کا کہنا تھا کہ وفاقی و صوبائی حکومت کو باور کرادیا کہ معاہدے کی پیشرفت کا جائزہ لیں، آصف زرداری نے مسئلہ حل کرنے کے لئے دو دن مانگے ہیں، امید ہے کہ مثبت نتائج سامنے آئیں گے۔ وفاقی وزیر کا کہنا تھا کہ اتحادی حکومت کے ساتھ بھی بہترین تعلقات آگے بڑھ رہے ہیں، چاہتے ہیں وفاق اور صوبے کے سطح پر ہونے والے معاہدوں پر عملدرآمد یقینی بنایا جائے۔ ایم کیو ایم کسی کی ہدایت یا فون کال پر فیصلے نہیں کرتی، اپنے عوامی آرا پر فیصلے کرتی ہے، جمہوری لوگ ہیں سارے آپشنز کھلے ہیں، نو جنوری کو ریلی نکالیں گے۔ رہنما ایم کیو ایم نے پی ٹی آئی کے الزامات کو بے وفوقانہ قرار دیتے ہوئے کہا عمران خان کو متحدہ کا شکریہ ادا کرنا چاہیے، کیونکہ انہوں نے ہمارے ووٹوں سے ساڑھے تین سال حکومت کی۔

کریڈٹ: انڈیپنڈنٹ نیوز پاکستان-آئی این پی