وفاقی وزیر خزانہ سینیٹر محمد اورنگزیب نے کہا ہے کہ آئی ایم ایف پروگرام پر عملدرآمد کیلئے پر عزم ہیں، معاشی اصلاحات کا عمل جاری رکھیں گے، ملکی معیشت ترقی کی راہ پرگامزن ہے ، اب نجی شعبے نے ملک کو آگے لیکر جانا ہے۔ان خیالات کااظہار انہوں نے اسلام آباد میں ایک تقریب سے خطاب کرتے ہوئے کیا ۔ محمد اورنگزیب کا کہنا تھا کہ ملکی معیشت ترقی کے راستے پر گامزن ہے، کرنٹ اکائونٹ خسارے میں کمی واقع ہوئی ہے، ہم نے اب معاشی بنیادوں کے استحکام کو مضبوط کرنا ہے۔انہوں نے کہا کہ ملکی معیشت میں بہتری کے بعد پالیسی ریٹ میں کمی کی گئی، پالیسی ریٹ میں کمی سے صنعت ترقی کرے گی، ہائوسنگ کے شعبے کا معیشت میں اہم کردار رہا ہے، حکومت نجی شعبے کو پالیسی گائیڈ لائن دے گی۔ان کا کہنا تھا کہ آئی ایم ایف پروگرام پر عملدرآمد کیلئے پر عزم ہیں، معاشی اصلاحات کا عمل جاری رکھیں گے۔ پچھلے 12 سے14 ماہ میں ہم نے مثبت اور قابل ذکر کارکردگی دکھائی ہے، مالی اور کرنٹ اکائونٹ کی سطح پر ہم مثبت سمت میں آگے بڑھ رہے ہیں۔ اب نجی شعبے نے ملک کو آگے لے کر جانا ہے۔انہوں نے کہا کہ ملکی آمدنی میں ہر ماہ اضافہ ہورہا ہے اور ہم اس پائیدار نکتے پر پہنچنے والے ہیں جہاں ہم یہ بات کرسکیں گے کہ آگے بڑھنے کے لیے ہمیں اس بنیاد کو کس طرح استعمال کرنا ہے۔

انہوں نے کہاکہ کرنسی کی بات جائے تو ایک موقع پر زرمبادلہ کے ذخائر صرف 2 ہفتے کی درآمدی ضروریات کو پورا کرنے کے قابل تھے جو کہ اب ڈھائی ماہ کی درآمدی ضروریات کو پورا کرسکتے ہیں۔انہوں نے کہاکہ اگر ہم اسی سمت آگے بڑھتے رہے تو زرمبادلہ کے ذخائر 3 ماہ کی درآمدی ضروریات کو پورا کرنے کے قابل ہوجائیں گے جسے عالمی معیار کے حوالے سے بہتر تصور کیا جاتا ہے۔انہوں نے کہاکہ نومبر میں مہنگائی بڑھنے کی شرح پچھلے 78 ماہ کی کم ترین سطح 4.9 فیصد پر پہنچ گئی ہے جبکہ شرح سود 13 فیصد سے نیچے آگئی ہے۔انہوں نے کہاکہ معیشت میں نجی شعبے کا کردار اہم ہے، حکومت نجی شعبے میں کم سے کم مداخلت کرے گی اور صرف پالیسی گائیڈ لائنز اور سبسڈیز دے گی کیونکہ اب نجی شعبے نے ملک کو آگے لے کر جانا ہے۔وفاقی وزیر کا کہنا تھا کہ تعمیرات کے شعبے کا معیشت میں نمایاں کردار ہے، معاشی اصلاحات کا عمل جاری رکھیں گے، ہم نے معاشی استحکام کی بنیادوں کو مضبوط کرنا ہے۔کم لاگت کے گھروں کی تعمیر اہم ہے، گھروں کی تعمیر کیلئے شرح سود میں کمی اہم کردار ادا کرے گی، سستے گھروں کی تعمیر میں مائیکروفنانس بنکوں کا اہم کردار ہوگا، اب حکومت مقامی سطح پر قرضے نہیں لے گی، حکومت نجی شعبے کی ہر سطح پر سپورٹ کیلئے تیار ہے، حکومت اب ماضی کی غلطیوں کو نہیں دہرائے گی۔

انہوں نے کہا کہ مارٹگیج فنانسنگ کے حوالے سے سٹیٹ بینک سے بات چیت ہوگی، سب اچھے کی خبر اس وقت تک نہیں ہے جب تک ہم لوگوں کو اعتماد میں نہ لیں، بینکنگ انڈسٹری زیادہ پیسہ خرچ کرتی ہے اس کا پتہ چلنا چاہیے۔محمد اورنگزیب کا مزید کہنا تھا کہ حکومت کا کام پالیسی کا تسلسل اور درست ماحول فراہم کرنا ہے، حکومت ہر جگہ اپنا تعاون فراہم کرنے کیلئے تیار ہے۔ انہوں نے کہا کہ آئی ایم ایف پروگرام پر عملدرآمد کے لیے پرعزم ہیں، معاشی اصلاحات کا عمل جاری رکھیں گے۔وزیر خزانہ نے بڑھتی آبادی اور موسمیاتی تبدیلی کو دو بنیادی مسائل قرار دیتے ہوئے کہا کہ ملک میں 24، 25 کروڑ کی آبادی ہے جو کہ 2.55 فیصد کی رفتار سے بڑھ رہی ہے۔انہوں نے کہا کہ تعمیرات کے شعبے کا آبادی سے براہ راست تعلق ہے، 2022 کا سیلاب تعمیر و بحالی کے حوالے سے ہمیں جگانے کے لیے کافی تھا۔انہوں نے کہاکہ سیلاب متاثرین کی بحالی کے لیے حکومت سندھ کا کردار قابل تعریف ہے جس نے متاثرین کے لییدریا کے کناروں پر دوبارہ گھر بنانے کے بجائے پائیدار تعمیرات کی طرف توجہ دی۔

کریڈٹ : انڈیپنڈنٹ نیوز پاکستان-آئی این پی