گورنر خیبرپختونخوا فیصل کریم کنڈی نے کہا ہے کہ اے پی سی میں صرف ایک جماعت نہیں آئی جو انتشار چاہتی ہے۔ ایک انٹرویو میں انہوں نے کہا میں نے اے پی سی بلائی اور کوہاٹ کا دورہ بھی کیا، حالات خراب ہونے پر تمام وزرا سے رابطے کیے، خیبرپختونخوا کی صورتحال بہت گھمبیر ہے، کرم اور سوات میں جو ہوا، یہ مرض لاعلاج ہوتا جارہا ہے۔انہوں نے کہا کہ بدقسمتی سے پی ٹی آئی حکومت میں آئی ہے، پی ٹی آئی کا کام یہ ہے کہ ملک میں انتشار پھیلے، خیبرپختونخوا کی آگ بجھانہیں سکتے ۔اسلام آباد میں آگ لگانے پہنچ جاتے ہیں، میرا اور آئی جی صاحب کا وہی حلقہ ہے جو وزیراعلی کے پی کا ہے، وہاں آپ شام کے بعد گھوم پھر نہیں سکتے۔فیصل کریم کنڈی نے کہا کہ اے پی سی میں صوبے کی تمام جماعتیں آئیں، سیاسی جماعتوں کے بھلے ہی اختلافات ہوں پر ایک چھت کے نیچے اکٹھی ہوئیں، اے پی سی میں صرف ایک جماعت نہیں آئی جو انتشار چاہتی ہے،ہمیں تو سرینا کی چائے کی پیالی بہت مہنگی پڑی۔انکا کہنا تھا کہ ہمیشہ خیبر پختونخوا کو تجربہ گاہ بنایا جاتا ہے، وزیراعلی کے پی اسمبلی میں تقریر کرتے ہیں کہ بارود اور اسلحہ خریدوں گا، کیا بارود اور اسلحہ ہماری فوج کیخلاف استعمال کریں گے؟ کیا بارود اور اسلحہ رینجر اور پولیس کیخلاف استعمال کریں گے؟

کریڈٹ : انڈیپنڈنٹ نیوز پاکستان-آئی این پی