ریسرچ انفارمیشن یونٹ ایوب زرعی تحقیقاتی ادارہ فیصل آبادکے ترجمان نے کہا کہ کسانوں کو زرعی اجناس کی بھرپور قوت مدافعت اور زیادہ پیداواری صلاحیت کی حامل نئی اقسام کی فراہمی ایوب ریسرچ کی اولین ترجیح ہے جبکہ ترقی پسند کاشتکاروں کو منافع بخش اقسام کی کاشت کیلئے تمام ممکن رہنمائی بھی فراہم کی جا رہی ہے تاکہ وہ گندم، کماد، دھان، کپاس، سورج مکھی،مکئی سمیت دیگر پھلوں و سبزیات کی بمپر کراپس حاصل کرکے نہ صرف ملکی ضروریات پوری کرسکیں بلکہ ضرورت سے زائد زرعی اجناس، پھلوں، سبزیوں کی برآمد سے زرمبادلہ بھی حاصل کیاجاسکے۔ مکئی کی منافع بخش کاشت کے حوالے سے انہوں نے کہاکہ آئندہ ایوب ریسرچ کاشتکاروں کومناسب قیمت پرمکئی کے ہائبرڈ بیج تیار کرکے دے گا۔اس موقع پرانہوں نے فوڈسکیورٹی اورفصلوں کی اجزائے خوراک کی اہمیت پر بھی زوردیا۔انہوں نے کہا کہ آلو، مکئی و دیگر سبزیاں دوسرے شہروں کو سپلائی کی جاتی ہیں۔انہوں نے سبزیوں کیلئے بیج اور ٹنل فارمنگ وجدید کاشتکاری پرزوردیتے ہوئے کہاکہ ملک کی بڑھتی ہوئی آبادی کی خوراک کی ضروت کو پورا کرنے کیلئے زرعی شعبہ میں انقلابی اقدامات کی ضرورت ہے۔انہوں نے کہا کہ ملک میں بڑھتی ہوئی کیمیائی کھادوں کی ضرورت کو پورا کرنے کیلئے درآمدی کھادوں پر انحصار کیا جارہا ہے اسلئے متوازن کھادوں کے استعمال و افادیت کے بارے میں بھی کاشتکاروں کو مناسب آگاہی فراہم کرناہو گی۔

کریڈٹ: انڈیپنڈنٹ نیوز پاکستان-آئی این پی