ڈائریکٹر لائیوسٹاک فیصل آبادڈویژنل ڈائریکٹر لائیو سٹاک فیصل آباد ڈاکٹرحیدر علی نے کہا ہے کہ مویشی پال حضرات اپنے جانوروں کو وبائی امراض سے محفوظ رکھنے کیلئے حفاظتی ٹیکے لگوائیں اور انہیں پھپھوندی زدہ روٹی کا ٹکرا کھلانے سے مکمل اجتناب کریں۔ انہوں نے کہا کہ گرم مرطوب آب وہوا کے باعث جانور مختلف اقسام کی وبائی اور متعدی امراض میں مبتلا ہو جاتے ہیں جس سے ان کی قوت مدافعت بھی کم ہو جاتی ہے جس سے بچاؤ کیلئے احتیاطی تدابیر پر عمل پیرا ہونا ضروری ہے۔انہوںنے کہا کہ موسم برسات میں جانوروں کو بجلی کے کرنٹ سے بچانے کیلئے الیکٹرک پولز کے ساتھ ہر گز نہ باندھیں۔انہوں نے کہا کہ اس موسم میں جانوروں میں گل گھوٹو کے مرض پھیلنے کا بھی خطرہ بڑھ جاتا ہے جس کی ویکسینیشن کرائی جائے۔انہوں نے کہا کہ محکمہ کے عملے کو ادویات اور ویکسین وافر مقدار میں فراہم کی گئی ہے۔ انہوں نے کہا کہ مویشی پال حضرات جانوروں کے علاج معالجہ کے سلسلہ میں قریبی مرکز سے رابطہ کریں۔

کریڈٹ: انڈیپنڈنٹ نیوز پاکستان-آئی این پی