آل پاکستان کاٹن پاور لومز ایسوسی ایشن کے چیئرمین اعجاز احمد ناگرہ نے کہا کہ برآمدات میں اضافہ کیلئے سٹیک ہولڈرز کی مشاورت از حد ضروری ہے جبکہ تجارتی پالیسی کی روشنی میں برآمدات میں اضافہ کیلئے مراعات،خصوصی پیکیج اور ٹیکسوں میں کمی بھی ضروری ہے تاکہ ملکی برآمدات میں اضافہ کے ساتھ ساتھ حکومتی ریونیوجنریشن میں بھی بہتری آسکے۔میڈیا سے بات چیت کے دوران انہوں نے کہا کہ تجارتی پالیسی کی روشنی میں کاروباری برادری کو مراعات کے علاوہ کاروبار کو آسان بنانے کیلئے قواعد وضوابط کو سادہ اور قابل فہم بنایا جانا اشد ضروری ہے لہٰذا کاروباری لاگت کو کم کرنے کیلئے صنعت و تجارت سے درآمدی اور برآمدی اشیا پر غیر ضروری بوجھ کو کم اور غیر ضروری رکاوٹیں دور کرنے کے عمل کو یقینی بنایا جائے۔انہوں نے کہا کہ برآمدات میں کمی کی اہم وجوہات میں بجلی گیس، پٹرولیم مصنوعات اور خام مال کی قیمتوں کا زیادہ ہونا بھی شامل ہے کیونکہ ان کی وجہ سے مصنوعات مہنگی ہونے کے باعث بین الاقوامی مارکیٹ میں پاکستانی اشیاکی مانگ میں کمی ہورہی ہے جبکہ دیگر ہمسایہ ممالک میں صنعتی مقاصد کیلئے پاکستان کی نسبت بجلی اور گیس سستی فراہم کی جارہی ہے اسلئے ضرورت اس امر کی ہے کہ پاکستان میں بھی صنعتی مقاصد کیلئے بجلی و گیس کی قیمتوں میں کمی کی جائے تاکہ عالمی منڈیوں میں مسابقت کی فضا برقرار رہے۔

کریڈٹ: انڈیپنڈنٹ نیوز پاکستان-آئی این پی