اسرائیل نے مصر کو رفح کراسنگ کے انتظام میں اقوام متحدہ اور حماس سے وابستہ نہ رہنے والی فلسطینی جماعتوں کو شریک کرنے کی تجویز پیش کی ہے، عرب میڈیا کے مطابق رفح کراسنگ کے انتظام اور سرحدی بحران پر بات چیت کے لیے ایک امریکی وفد اگلے ہفتے قاہرہ پہنچے گا۔ واشنگٹن نے قاہرہ کو رفح کراسنگ پر اسرائیلی موجودگی کی اجازت نہ دینے کے لیے اپنی حمایت سے آگاہ کر دیا ہے۔ میڈیا رپورٹس کے مطابق وائٹ ہائوس آئندہ ہفتے قاہرہ میں سہ فریقی امریکی-مصری-اسرائیلی اجلاس کے انعقاد کی کوشش کر رہا ہے۔ اجلاس کا مقصد رفح کراسنگ کو دوبارہ کھولنے اور سرحد کو محفوظ بنانے پر بات چیت کرنا ہے۔ امریکی حکام کا کہنا ہے کہ سہ فریقی اجلاس میں اہم مسائل میں سے ایک یہ منصوبہ ہوگا کہ رفح کراسنگ کی فلسطینی جانب کو اسرائیلی فوج کی موجودگی کے بغیر دوبارہ کیسے کھولا جائے۔ امریکی حکام کے مطابق صدر جو بائیڈن نے اپنے مصری ہم منصب عبدالفتاح السیسی کو مطلع کیا کہ رفح کراسنگ کے ذریعے غزہ میں ٹرکوں کی آمدورفت دوبارہ شروع نہ کی گئی تو واشنگٹن قاہرہ کو عوامی سطح پر تنقید کا نشانہ بنائے گا۔ قومی سلامتی کونسل کے ایک سینئر اہلکار کی قیادت میں ایک امریکی وفد چند دنوں میں مصر کا دورہ کرے گا۔

کریڈٹ: انڈیپنڈنٹ نیوز پاکستان-آئی این پی