پاکستان میں سپیکٹرم کی ناکافی دستیابی نیٹ ورک کی کارکردگی میں بری طرح رکاوٹ ہے اور ٹیلی کمیونیکیشن سروسز کی ترقی کو روکتی ہے۔ویلتھ پاک سے بات کرتے ہوئے، سسٹین ایبل ڈیولپمنٹ پالیسی انسٹی ٹیوٹ کے ایسوسی ایٹ ریسرچ فیلو احد نذیر نے کہا کہ سروس فراہم کرنے والوں کو درپیش بنیادی رکاوٹوں میں سے ایک حکومت کی جانب سے کافی سپیکٹرم جاری کرنے میں ہچکچاہٹ ہے۔ "جب حکومت سپیکٹرم کو نیلامی کے لیے پیش کرتی ہے، تو ٹیلی کام کمپنیوں کے لیے شروع ہونے والے اخراجات اکثر بہت زیادہ ہوتے ہیں۔ قیمتوں کا تعین کرنے کی یہ حکمت عملی ان کمپنیوں کی نیٹ ورک کی توسیع اور بہتری میں سرمایہ کاری کرنے کی صلاحیت کو محدود کرتی ہے۔ مزید برآں امریکی ڈالر میں مقررہ قیمتوں سے صورتحال مزید خراب ہو جاتی ہے کیونکہ شرح مبادلہ میں تبدیلی کے نتیجے میں روپے کی قیمتیں زیادہ ہو جاتی ہیں۔ نتیجتا، یہ مقامی آپریٹرز پر مالی دباو پیدا کرتا ہے جو اپنے علاقائی ہم منصبوں کے ساتھ مقابلہ کرنے کے لیے جدوجہد کرتے ہیں۔انہوں نے اس بات پر روشنی ڈالی کہ ٹیلی کام پالیسی 2015 ان اہم مسائل کو حل کرنے کے لیے بنائی گئی تھی جس کا مقصد سپیکٹرم کی تقسیم کو ہموار کرنا اور نیٹ ورک کی مجموعی کارکردگی کو بڑھانا ہے۔ تاہم انہوں نے کہا کہ پالیسی کے ڈیزائن اور حقیقی عمل درآمد کے درمیان فرق واضح ہے۔نذیر نے افسوس کا اظہار کیا کہ ناکافی نگرانی، واضح ڈیڈ لائن کا فقدان اور وزارت آئی ٹی اور ٹیلی کام کے اندر صلاحیت کے مسائل نے عمل درآمد میں رکاوٹ ڈالی ہے۔ قلیل مدتی کنٹریکٹ ورکرز پر انحصار معاملات کو مزید پیچیدہ بناتا ہے، جس کے نتیجے میں مربوط پالیسی کے نفاذ کے لیے ضروری ادارہ جاتی علم کا نقصان ہوتا ہے۔مزید برآں، اصلاحات کی فوری ضرورت کے باوجود تقریبا 10 سال قبل اس کی منظوری کے بعد سے ٹیلی کام پالیسی کو اپ ڈیٹ نہیں کیا گیا ہے۔

ترقی کا یہ فقدان صنعت کو تیزی سے ترقی پذیر تکنیکی منظر نامے کے مطابق ڈھالنے اور موبائل براڈ بینڈ کی بڑھتی ہوئی طلب کو پورا کرنے سے روکتا ہے۔ویلتھ پاک سے بات کرتے ہوئے یوفون4G میں فرنچائز سپورٹ کے سربراہ طارق بیگ نے کہا کہ چونکہ سروس فراہم کرنے والے محدود سپیکٹرم سے دوچار ہیں، مناسب سپیکٹرم کی کمی کا براہ راست اثر صارفین پر پڑتا ہے۔ صارفین اکثر سست انٹرنیٹ کنیکشن، بے ترتیب کنیکٹیویٹی اور عصری ٹیلی کمیونیکیشن سروسز تک محدود رسائی کے بارے میں شکایت کرتے ہیں۔پاکستان میں موبائل براڈ بینڈ کے لیے دستیاب سپیکٹرم صرف 29.7 ایم ایچ زیڈہے، جو اس کے ہمسایہ ممالک سے بہت کم ہے۔ سری لنکا کے پاس 32.9، بنگلہ دیش کے پاس 37.4، انڈیا کے پاس 47.3 اور ویتنام کے پاس 30.1ایم ایچ زیڈہے۔سپیکٹرم کی دستیابی میں یہ فرق علاقائی ٹیلی کام مارکیٹ میں ملک کے مسابقتی نقصان کو نمایاں کرتے ہیںجو سروس فراہم کرنے والوں کو درپیش مشکلات کی بھی عکاسی کرتے ہیں۔بیگ نے رائے دی کہ ایک ایسی دنیا میں جہاں ڈیجیٹل کنیکٹیویٹی تیزی سے ضروری ہے، ناکافی سپیکٹرم کے نتائج سروس فراہم کرنے والوں سے آگے بڑھتے ہیںجس سے شہریوں کی مجموعی معیشت اور معیار زندگی متاثر ہوتا ہے۔ان مسائل کو حل کرنے کے لیے ایک جامع نقطہ نظر ضروری ہے۔ حکومت کو اضافی سپیکٹرم کے بروقت اجرا کو ترجیح دینی چاہیے اور نیلامی کی قیمتوں پر نظر ثانی کرنی چاہیے تاکہ اسے مقامی کمپنیوں کے لیے مزید قابل رسائی بنایا جا سکے۔ مزید برآںوزارت کے اندر نگرانی اور تعاون کو بڑھانا پالیسی اور عمل کے درمیان فرق کو ختم کرے گا، اس بات کو یقینی بنائے گا کہ ٹیلی کام پالیسی کے مقاصد کو پورا کیا جائے۔

کریڈٹ: انڈیپنڈنٹ نیوز پاکستان-آئی این پی ویلتھ پاک