بالی ووڈ فلموں کے پروڈیوسرشیلندر سنگھ نے انکشاف کیا ہے کہ اداکار سلمان خان نے فلم پھر ملیں گے میں بغیر معاوضہ کام کیا تھا۔ حال ہی میں فلم کے پروڈیوسر شیلندر سنگھ نے انسٹاگرام پر ایک ویڈیو شیئر کی جس میں انہوں نے انکشاف کیا کہ جب پوری بالی ووڈ انڈسٹری انکار کر رہی تھی تب سلمان خان نے یہ کردار بغیر کسی معاوضے کے قبول کیا۔انکا کہنا تھا کہ ایڈز جیسے سنگین موضوع پر آگاہی پھیلانا پورے بھارت بالخصوص نوجوانوں کیلئے ضروری تھا۔انہوں نے مزید بتایا کہ فلم کے مرکزی کردار کو ایچ آئی وی ہوتا ہے اور وہ کہانی کے اختتام پر مر جاتا ہے۔ تاہم اس کہانی کی وجہ سے پوری فلم انڈسٹری نے اس کردار کو قبول کرنے سے انکار کردیا۔اپنی بات جاری رکھتے ہوئے انکا کہنا تھا کہ تب میں نے سلمان خان کو کال کی، اگرچہ ان کے مداح اس اختتام سے خوش نہیں تھے لیکن پیغام پورے ملک میں پہنچ گیا۔پروڈیوسر کا کہنا تھا کہ اس وقت اور آج بھی بالی ووڈ میں سب سے بڑا یوتھ آئیکون سلمان خان ہیں، انہوں نے فلم پھر ملیں گے میں کام کرنے کا معاوضہ صرف ایک روپیہ لیا۔

کریڈٹ: انڈیپنڈنٹ نیوز پاکستان-آئی این پی