فرانس اور سپین کی فٹ بال ٹیمیں پیرس اولمپکس گیمز میں مردوں کے فٹ بال ایونٹ کے فائنل میں پہنچ گئیں۔ میزبان فرانس کی ٹیم نے سیمی فائنل میچ میں مصر کی ٹیم کو شکست دی جبکہ سپین کی ٹیم نے سیمی فائنل میچ میں مراکش کو مات دے کر فائنل کیلئے کوالیفائی کیا۔سیمی فائنلز کھیلے جانے کے بعد مینز فٹ بال ایونٹ کی دو فائنلسٹ ٹیموں کی نشاندہی ہوگئی ہے اور فرانس اور سپین کی فٹ بال ٹیموں کے درمیان طلائی تمغے کے لئے میچ 9اگست کو کھیلا جائے گا۔سٹیڈ ڈی مارسیلی، مارسیلی میں کھیلے گئے مینز فٹ بال ایونٹ کے پہلے سیمی فائنل میچ میں سپین اور مراکش کی ٹیمیں آمنے سامنے تھیں جس میں سپین کی ٹیم نے سخت مقابلے کے بعد مراکش کی ٹیم کو ایک کے مقابلے میں 2گول سے شکست دے کر فائنل کے لئے کوالیفائی کیا۔سٹیڈ ڈی لیون، ڈیسینس ،چارپیو کے مقام پر کھیلے گئے دوسرے سیمی فائنل میچ میں میزبان فرانس کی مینز فٹ بال ٹیم نے شاندار کھیل پیش کرتے ہوئے مصر کی ٹیم کو ایک کے مقابلے میں 3گول سے ہرا کر فائنل کے لئے کوالیفائی کیا۔ یادرہے کہ سپین اور فرانس کی ٹیموں کے درمیان طلائی تمغے کے لئے میچ 9اگست کو کھیلا جائے گا۔

کریڈٹ: انڈیپنڈنٹ نیوز پاکستان-آئی این پی