مردوں کی عالمی سنوکر ٹیم اینڈ سکس ریڈ چیمپئن شپ دوحہ، قطر میں جاری ہے جس میں آج 7 نومبر کو احسن رمضان (پاکستان)کا مقابلہ سیانگ ہیو (کوریا)سے، بابر مسیح (پاکستان)کا مقابلہ عندالرحمن سیف (یو اے ای)سے اور محمد نسیم اختر (پاکستان)کا مقابلہ شری کرشنا سوری نارائنن (انڈیا)سے ہوگا۔ پاکستان سنوکر فیڈریشن کے ترجمان نوید کپاڈیہ نے بتایا کہ چیمپئن شپ میں دنیا بھر سے کھلاڑی حصہ لے رہے ہیں،اس سے قبل گزشتہ روز پاکستان کے محمد نسیم اختر نے فن لینڈ کے ایسا اوکارین کو 2-4سے اور پاکستان کے بابر مسیح نے عمان کے حسین علاوال کو 1-4 سے شکست دی۔ 8 نومبر کو آخری 38رائونڈ، آخری 32رائونڈ، آخری 16رائونڈ کے میچز کھیلے جائیں گے۔ 9 نومبر کو آخری 8واں رائونڈ اور سیمی فائنلز مقابلے کھیلے جائیں گے۔ 10نومبر کو فائنل کھیلا جائے گا۔ قومی ٹیم میں بابر مسیح، محمد نسیم اختر، احسن رمضان اور محمد ساجد شامل ہیں۔ چیمپئن شپ 5 سے 15نومبر تک دوحہ، قطر میں کھیلی جائے گی۔ جس میں دنیا بھر سے کھلاڑی حصہ لے رہے ہیں۔ ورلڈ مینز(ریڈ 15)کے مقابلے 5سے 15نومبر تک کھیلے جائیں گے جس میں بابر مسیح، محمد نسیم اختر اور احسن رمضان پاکستان کی نمائندگی کریں گے،ورلڈ ٹیم ایونٹ کے مقابلے 5سے 12نومبر تک کھیلے جائیں گے۔ پاکستان کی جانب سے نسیم اختر اور احسن رمضان (ٹیم اے)جبکہ محمد ساجد اور بابر مسیح (ٹیم بی)حصہ لیں گے۔ ورلڈ سکس ریڈ کے مقابلے 5سے 15نومبر تک کھیلے جائیں گے جس میں پاکستان کی طرف سے محمد نسیم اختر اور احسن رمضان شرکت کریں گے۔

کریڈٹ: انڈیپنڈنٹ نیوز پاکستان-آئی این پی