معروف سینئر اداکار وسیم عباس نے ساتھی اداکار فردوس جمال کے اداکار ہمایوں سعید اور ماہرہ خان کے بارے میں دیے متنازع بیان پر اپنے ردِعمل کا اظہار کیا ہے۔ ایک ویب پروگرام میں جب وسیم عباس سے اس معاملے پر رائے مانگی گئی تو انہوں نے کہا کہ میں اس بارے میں کیا کہہ سکتا ہوں؟ میرے خیال میں ہمیں کسی کی عمر کے حوالے سے بات کرنے کا کوئی حق نہیں ہے۔اداکار نے کہا کہ مجھے کسی کی عمر سے کوئی فرق نہیں پڑتا، ماہرہ خان اب بھی خوبصورت ہیں، وہ آخری بار مولا جٹ میں اسکرین پر نظر آئی تھیں اور ہمیں اس بات کو قبول کرنا چاہیے کہ وہ اس فلم میں بہت خوبصورت لگ رہی تھیں۔انہوں نے کہا کہ سینئر ہونے کی حیثیت سے ہمیں اپنے ساتھی اداکاروں کے بارے میں اپنی رائے بتاتے وقت بہت محتاط رہنا چاہیے۔وسیم عباس نے کہا کہ کسی بھی اداکار کی کارکردگی پر تنقید کی جا سکتی ہے لیکن اس کی عمر کے حوالے سے بات کرنا مناسب نہیں ہے۔ وسیم عباس نے ہمایوں سعید کی تعریف کرتے ہوئے کہا کہ وہ بہت بڑے اسٹار ہیں اور ان کے مداحوں کی بہت بڑی تعداد ہے اس لیے وہ پاکستان کے مارلن برانڈو ہی ہیں۔

کریڈٹ: انڈیپنڈنٹ نیوز پاکستان-آئی این پی