ہسپانوی بین الاقوامی شہرت یافتہ ٹینس سٹار کارلوس الکاراز اوراٹلی کے ٹینس کھلاڑی جینک سنر اپنی عمدہ کارکردگی کے تسلسل کو برقرار رکھتے ہوئے فرنچ اوپن ٹینس میں مردوں کے سنگلز مقابلوں کے سیمی فائنل رائونڈ میں پہنچ گئے جبکہ یونانی ٹینس کھلاڑی سٹیفانوس اور بلغاریہ کے گریگور دیمتروف کوارٹر فائنل رائونڈ میں ہارکر میگا ایونٹ سے باہر ہوگئے۔ مینز سنگلز مقابلوں کے کوارٹر فائنل رائونڈ میں سپین کے کارلوس الکاراز نے شاندار کھیل پیش کرتے ہوئے حریف یونانی ٹینس کھلاڑی سٹیفانوس سیٹسیپاس کو سٹریٹ سیٹس میں ٹائی بریک پر 3-6، 6-7(3-7)اور 4-6سے شکست دے کر سیمی فائنل رائونڈ کے لئے کوالیفائی کرلیا۔اٹلی کے جینک سنر نے انتہائی شاندار کھیل پیش کرتے ہوئے حریف بلغارین ٹینس کھلاڑی گریگور دیمتروف کوسٹریٹ سیٹس میں ٹائی بریک پر 2-6، 4-6اور6-7(3-7)سے شکست دی اور ٹاپ فور رائونڈ کے لئے کوالیفائی کرلیا۔سیمی فائنل رائونڈ میں سپین کے کارلوس الکاراز کا مقابلہ اٹلی کے ٹینس سٹار جینک سنر سے ہوگا۔

کریڈٹ: انڈیپنڈنٹ نیوز پاکستان-آئی این پی