پاکستان کرکٹ بورڈ نے دورہ آسٹریلیا اور آئی سی سی ویمنز ٹی ٹوئنٹی ورلڈکپ کے لیے قومی ویمن اسکواڈ کا اعلان کردیا،دورہ آسٹریلیا اور ورلڈکپ کے لیے 15رکنی ویمن اسکواڈ کا اعلان کیا گیا ہے جس میں فاسٹ بولر ڈیانا بیگ کی واپسی ہوئی ہے جب کہ طوبی حسن اور سعدیہ اقبال بھی انجریز سے ریکور ہونے کے بعد ٹیم کا حصہ بن گئی ہیں،پاکستان ویمن ٹیم جنوری میں آسٹریلیا میں وائٹ بال سیریز کھیلے گی اور ویمن ٹی ٹوئنٹی ورلڈکپ 10سے 26فروری تک جنوبی افریقا میں ہوگا جب کہ دونوں ایونٹس کے لیے قومی ویمن ٹیم کی قیادت بسمہ معروف کریں گی،دورہ آسٹریلیا میں ون ڈے سیریز کے لیے اسکواڈ میں کپتان بسمہ معروف ،عالیہ ریاض، عائشہ نسیم، ڈیانا بیگ، فاطمہ ثنا، غلام فاطمہ، کائنات امتیاز، منیبہ علی، نشرہ سندھو، ندا ڈار ، عمیمہ سہیل، صدف شمس، سعدیہ اقبال، سدرا امین اور سدرا نواز شامل ہیں جب کہ ٹریولنگ ریزروز میں ایمن انور، جویریہ خان اور طوبی حسن کو رکھا گیا ہے،دوسری جانب ٹی ٹوئنٹی اسکواڈ میں بھی یہی کھلاڑی شامل ہیں تاہم ریزروز میں غلام فاطمہ، کائنات امتیاز اور صدف شمس شامل ہیں،اس کے علاوہ سلیم جعفر قائم مقام ہیڈ کوچ اور بولنگ کوچ جب کہ توفیق عمر بیٹنگ کوچ ہوں گے،قومی ویمن ٹیم کی چیف سلیکٹر اسماویہ اقبال کا کہنا تھا کہ بہترین ٹیموں کا انتخاب کرنے کی کوشش کی ہے، تمام کھلاڑیوں کے لیے نیک خواہشات ہیں،چیف سلیکٹر کے مطابق دورہ آسٹریلیا میں ٹیم ون ڈے میچز 16 ، 18اور 21جنوری کو کھیلے گی اور ٹی ٹوئنٹی میچز 24،26اور 29جنوری کو ہوں گے، آئی سی سی ٹی ٹوئنٹی ورلڈکپ میں پاکستان ٹیم 12فروری کو بھارت کے خلاف میچ کھیلے گی جب کہ 15فروری کو آئرلینڈ، 19فروری کو ویسٹ انڈیز اور 21فروری کو انگلینڈ سے مقابلہ ہوگا۔

کریڈٹ: انڈیپنڈنٹ نیوز پاکستان-آئی این پی