چیئرمین پاکستان کرکٹ بورڈ (پی سی بی )محسن نقوی نے آئی سی سی چیمپئنز ٹرافی ٹورنامنٹ کے لیے ضروری کمیٹیاں تشکیل دینے کی ہدایت کر دی۔ نیشنل کرکٹ اکیڈمی لاہور میں محسن نقوی کی صدارت میں اجلاس ہوا، جس میں آئی سی سی چیمپئنز ٹرافی ٹورنامنٹ 2025 کی تیاریوں اور فیصل آباد میں جاری چیمپئنز ون ڈے کپ اور اسٹیڈیمز اپ گریڈیشن پروجیکٹ کا بھی جائزہ لیا گیا۔ اس موقع پر گفتگو کرتے ہوئے چیئرمین محسن نقوی نے کہا کہ آئی سی سی چیمپئنز ٹرافی کے حوالے سے فوری ضروری کمیٹیاں تشکیل دی جائیں، ہر کمیٹی کی ذمے داریاں طے کی جائیں اور کام شروع کیا جائے۔ ان کا کہنا تھا کہ چیمپئنز ٹرافی ٹورنامنٹ میں دنیا کی بڑی ٹیمیں آ رہی ہیں، انتظامات خوب سے خوب تر ہونے چاہئیں۔ انہوں نے کہا کہ اسٹیڈیمز اپ گریڈیشن کا کام مقررہ مدت میں مکمل کیا جائے، اپ گریڈیشن کے بعد شائقین کرکٹ کا ویو بہتر ہو گا اور میچ کو بہت انجوائے کریں گے ، فیصل آباد میں پی ایس ایل میچ کرانے کا جائزہ لیں گے۔

کریڈٹ: انڈیپنڈنٹ نیوز پاکستان-آئی این پی