انگلش پریمیئر فٹ بال لیگ میں چیلسی ،لیورپول اوربرائٹن اینڈ ہوو البیون کی ٹیموں نے اپنے اپنے میچز جیت لئے ۔ چیلسی کی ٹیم نے یکطرفہ مقابلے کے بعد ویسٹ ہیم یونائیٹڈ کو 0-5 گول سے پچھاڑ دیا،برائٹن اینڈ ہوو البیون نے انتہائی سخت مقابلے کے بعد آسٹن ولا کو 0-1 گول سے مات دی ۔ایک اور میچ میں لیورپول کی ٹیم نے ٹوٹنہم ہاٹ پور کو دو کے مقابلے میں 4 گول سے شکست دی ۔ انگلش پریمیئر لیگ کے 32 ویں سیزن کے انتہائی دلچسپ اور کانٹے دار مقابلوں کا سلسلہ انگلینڈ میں جاری ہے۔چیلسی اور ویسٹ ہیم یونائیٹڈ کی ٹیموں کے درمیان سٹامفورڈ برج، لندن میں کھیلے گئے میچ میں چیلسی کی ٹیم میچ کے آغاز سے ہی ویسٹ ہیم یونائیٹڈ کی ٹیم پر حاوی ہوگئی۔ چیلسی کے کول پامر نے 15 ویں منٹ پر ایک گول کر کے اپنی ٹیم کو ویسٹ ہیم یونائیٹڈ کے خلاف 0-1 گول کی برتری دلا دی۔ چیلسی کی طرف سے کونور گالاگھر نے 30 ویں منٹ پر ایک گول کر دیا، جس کے ٹھیک 6منٹ بعد نونی مادوکینے ایک گول کر کے مقابلہ 0-3 کر دیا، میچ کے ہاف پر چیلسی کو ویسٹ ہیم یونائیٹڈ کے خلاف 0-3 کی برتری حاصل تھی۔دوسرے ہاف کے 48 ویں منٹ پر نکولس جیکسن نے ایک گول کر کے مقابلہ 0-4 کر دیا ، میچ کے اختتام سے قبل 80 ویں منٹ پر نکولس جیکسن نے اپنا دوسرا اور میچ کا پانچواں گول کرکے مقابلہ 0-5 کر دیا جو میچ کے اختتام تک برقرار رہا۔یمیکس سٹیڈیم، برائٹن میں کھیلے گئے میچ میں برائٹن اینڈ ہوو البیون اور آسٹن ولا کی ٹیمیں آمنے سامنے تھیں جس میں برائٹن اینڈ ہوو البیون نے انتہائی سخت مقابلے کے بعد آسٹن ولا کو 0-1 گول سے ہرا دیا۔برائٹن اینڈ ہوو البیون کے جوا پیڈرو جنکیرانے میچ کے 87 ویں منٹ میں واحد گول کر کے اپنی ٹیم کی فتح میں اہم کردار ادا کیا۔ اینفیلڈ، لیورپول میں کھیلے گئے میچ میں لیورپول کی ٹیم نے ٹوٹنہم ہاٹ پور کو دو کے مقابلے میں 4 گول سے شکست دی ۔ لیورپول کی طرف سے محمد صلاح،اینڈریو رابرٹسن،کوڈی گاکپو اورہاروی ایلیٹ نے ایک ایک گول کر کے اپنی ٹیم کی فتح میں اہم کردار ادا کیا۔

کریڈٹ: انڈیپنڈنٹ نیوز پاکستان-آئی این پی