آزادی کپ ٹین پن بائولنگ چیمپئن شپ کے لئے آرگنائزنگ کمیٹی کا اجلاس جمعرات کے روز(آج)اسلام آباد میں ہوگا جس کی صدارت پاکستان ٹین پن بائولنگ فیڈریشن کے صدر اور چیئرمین آرگنائزنگ کمیٹی اعجاز الرحمن کریں گے۔ اجلاس میں چیمپئن شپ کے انتظامات کا جائزہ لیا جائے گا۔پاکستان ٹین پن بائولنگ فیڈریشن کے زیر اہتمام آزادی کپ ٹین پن بائولنگ چیمپئن شپ 8اگست سے لیزر سٹی بائولنگ کلب، جناح پارک، راولپنڈی میں شروع ہو گی جس میں ملک بھر سے مرد اور خواتین کھلاڑی حصہ لیں گے۔ چیمپئن شپ میں 8کیٹگریز کے مقابلے رکھے گئے ہیں جن میں مینز سنگلز، مینز ڈبلز،لیڈیز سنگلز، ایمچور، ڈیف مینز سنگلز، ڈیف لیڈیز سنگلز، ٹیم ایونٹ اور ٹیک ٹاکرز کے مقابلے شامل ہیں۔انہوں نیکہا کہ ایونٹس میں شرکت کی خواہش رکھنے والے کھلاڑی اپنے اپنے ناموں کی رجسٹریشن 20جولائی سے 7اگست تک کروا سکتے ہیں۔ ٹورنامنٹ کے سیمی فائنل مقابلے 13 اگست کو جبکہ فائنل مقابلے 14اگست کو کھیلے جائیں گے۔ ٹورنامنٹ کی رنگا رنگ اختتامی تقریب پاکستان سپورٹس کمپلیکس اسلام آباد کے لیاقت جمنازیم یا جناح سٹیڈیم میں منعقد ہوگی جس کے لئے جشن آزادی کے سلسلہ میں رنگا رنگ پروگرام ترتیب دیئے جا رہے ہیں جن میں قومی ترانہ، ثقافتی اینڈ کلچر شوز، ملی نغموں کے علاوہ مختلف شعبوں سے تعلق رکھنے والے فنکار اپنے اپنے فن کا مظاہرہ بھی کریں گے۔ٹورنامنٹ میں 20لاکھ روپے انعامی رقم رکھی گئی ہے اور تقریب کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔ واضح رہے کہ پاکستان ٹین پن بائولنگ فیڈریشن کے زیر اہتمام یہ مقابلے 2003سے ہر سال جشن آزادی کے موقع پر منعقد ہو رہے ہیں۔

کریڈٹ: انڈیپنڈنٹ نیوز پاکستان-آئی این پی