آئی سی سی چیمپئنز ٹرافی کا پہلا سیمی فائنل مقابلہ آج دبئی میں بھارت اور آسٹریلیا کے مابین ہوگا۔ اہم میچ سے قبل آسٹریلیا کو بڑا دھچکا لگا ہے، جراح مزاج اوپنر میتھیو شارٹ انجری کی وجہ سے ٹورنامنٹ سے باہر ہوگئے۔دائیں ہاتھ کے جارح مزاج اوپنر میتھیو شارٹ افغانستان کے خلاف میچ میں گھٹنے کی انجری کا شکار ہوئے تھے۔اس انجری کی وجہ سے اب میتھیو شارٹ آئی سی سی چیمپئنز ٹرافی سے باہر ہوگئے ہیں۔ ان کی جگہ کوپر کونولی کو آسٹریلوی اسکواڈ میں شامل کرلیا گیا ہے۔21 سالہ کوپر کونولی آسٹریلیا کی جانب سے 3 ایک روزہ میچز کھیل چکے ہیں۔آئی سی سی کی ایونٹ ٹیکنکل کمیٹی نے آسٹریلوی اسکواڈ میں تبدیلی کی منظوری بھی دے دی ہے۔ آئی سی سی چیمپئنز ٹرافی کے سیمی فائنل میں آسٹریلیا آج 4 مارچ کو بھارت کے خلاف مدمقابل ہوگا۔ یہ میچ دبئی میں کھیلا جائے گا جبکہ دوسرے سیمی فائنل میں پروٹیز کا کیوی ٹیم سے مقابلہ کل 5 مارچ کو لاہور میں ہوگا۔

کریڈٹ: انڈیپنڈنٹ نیوز پاکستان-آئی این پی