اے سی سی ویمنز ٹی ٹوئنٹی ایشیا کپ میں پاکستان ویمنز نے نیپال ویمنز کو 9وکٹوں سے شکست دیدی۔اس میچ کی خاص بات سعدیہ اقبال کی عمدہ بولنگ ،گل فیروزہ کی ٹی ٹوئنٹی انٹرنیشنل میں پہلی نصف سنچری اور منیبہ علی کے ساتھ سنچری اوپننگ پارٹنرشپ تھی۔یہ اس ٹورنامنٹ میں پاکستان کی پہلی کامیابی ہے۔پاکستان نے ٹاس جیت کر پہلے نیپال کو بیٹنگ دی جس نے مقررہ 20اوورز میں6وکٹوں کے نقصان پر 108رنز بنائے۔پاکستان ٹیم نے جواب میں 11.5اوورز میں ایک وکٹ کے نقصان پر مطلوبہ اسکور پورا کرلیا۔پاکستان ٹیم کی بولرز کی عمدہ کارکردگی نے نیپال کو کسی بھی موقع پر اعتماد سے بیٹنگ کا موقع نہیں دیا۔ میچ کے پہلے ہی اوور میں فاطمہ ثنا نے سمجھنا کھاڈکا کو 4کے انفرادی اسکور پر نشرہ سندھو کے ہاتھوں کیچ کرادیا جس کے بعد دسویں اوور تک نیپال کی چار وکٹیں گرچکی تھیں۔ سعدیہ اقبال نے اپنے ایک ہی اوور میں کبیتا کنور اور کپتان اندو برما کو آئوٹ کردیا۔نیپال کی طرف سے کبیتا جوشی چار چوکوں اور ایک چھکے کی مدد سے 31رنز بناکر ناٹ آئوٹ رہیں۔ سیتا رانا نے تین چوکوں کی مدد سے 26اور پوجا مہاتو نے بھی تین چوکوں کی مدد سے 25رنز اسکور کیے۔ گل فیروزہ اور منیبہ علی نے پاکستان کو 105رنز کا شاندار آغاز فراہم کیا۔ یہ ٹی ٹوئنٹی انٹرنیشنل میں پاکستان کی دوسری سنچری اوپننگ پارٹنرشپ ہے۔اس سے قبل جویریہ خان اور جویریہ رئوف نے 2013میں آئرلینڈ کیخلاف پہلی وکٹ کے لیے 123رنز بنائے تھے۔گل فیروزہ 10چوکوں کی مدد سے 57رنز بناکر آئوٹ ہوئیں۔ منیبہ علی نے 46رنز اسکور پر ناٹ آئوٹ رہیں ان کی اننگز میں 8چوکے شامل تھے۔

کریڈٹ: انڈیپنڈنٹ نیوز پاکستان-آئی این پی