معروف موسیقار و گلوکار شیراز اپل نے انکشاف کیا ہے کہ انہیں ایوارڈ یافتہ بھارتی موسیقار اے آر رحمن کے ساتھ کام کرنے کا خواب پورا کرنے میں سات سال لگے۔شیراز اپل نے حال ہی میں احمد علی بٹ کے پوڈکاسٹ میں شرکت کی۔شیراز اپل کا کہنا تھا کہ جب انہوں نے بھارتی موسیقار اے آر رحمن کو سنا تو وہ انہیں سنتے ہی رہ گئے۔شیراز اپل کے مطابق انہوں نے 1993 سے ہی اے آر رحمن کو مختلف ای میلز بھیجنا شروع کیے لیکن انہیں کوئی جواب نہیں ملا اور پھر سات سال بعد جب وہ امریکا گئے تو وہاں ان کی ملاقات بھارتی موسیقار سے ہوئی۔شیراز اپل کا کہنا تھا کہ انہوں نے اے آر رحمن کو اپنے کام کی سی ڈی دی اور پھر 6 ماہ بعد بھارتی موسیقار نے انہیں کام کرنے کی پیش کش کی اور انہوں نے پہلی بار لندن میں کام کیا اور بعد ازاں وہ بھارت بھی گئے، جہاں وہ دو ماہ تک رہے۔انہوں نے بتایا کہ اے آر رحمن کے ساتھ کام کرنے کے دوران انہوں نے بہت کچھ سیکھا اور اس وقت کئی مشہور بالی ووڈ فلمی گانے ان کے سامنے بنے اور انہیں یقین نہیں آ رہا تھا کہ ان کا بھارتی موسیقار کے ساتھ کام کرنے کا خواب سات سال بعد پورا ہوا۔

کریڈٹ: انڈیپنڈنٹ نیوز پاکستان-آئی این پی