عیدالفطر کے دوران مقامی مانگ اور گوشت کی برآمدات میں اضافے کے باعث ملک کے اندر گوشت کی قیمت میں اضافہ ریکارڈ کیا گیا ہے۔ بچھیا کے ہڈی اور بغیر ہڈی والے گوشت کی قیمت مختلف علاقوں میں اضافے کے بعد بالترتیب 900 سے 950 روپے اور 1100 سے 1200 روپے فی کلو تک پہنچ گئی ہے، جو اس سے قبل 850 اور ایک ہزار روپے فی کلو میں دستیاب تھا۔گزشتہ ڈیڑھ مہینے کے دوران خوردہ فروشوں نے گوشت کی فی کلو قیمت 200 روپے تک بڑھا دی اور اس کی وجہ تھوک کی قیمتوں میں اضافہ بتایا ہے۔یہی صورتحال بکرے کے گوشت کی بھی ہے، جس کی قیمت رمضان کے مہینے میں مختلف منڈیوں میں 1700 سے 1800 روپے فی کلو دیکھی گئی جو 200 روپے اضافے کا اضافہ ہے، مختلف مارکیٹوں مثال کے طور پر برنس روڈ پر بکرے کا گوشت 2 ہزار سے 2 ہزار 200 روپے فی کلو میں فروخت ہو رہا ہے، کمشنرنے اس کے نرخ 1400 روپے فی کلو مقرر کیے ہیں لیکن پورے شہر میں اس قیمت پر گوشت دستیاب نہیں ہے۔خوردہ فروشوں نے مقامی سطح پر قیمتیں بڑھنے کی وجہ گوشت کی برآمدات کو قرار دیا ہے،تاہم ملک کی مجموعی گوشت کی برآمدات کی مالی سال کے ابتدائی 9 ماہ کے دوران میں اوسطاً فی ٹن قیمت 4 ہزار 378 ڈالر حاصل کی، جو گزشتہ مالی سال کی اسی مدت میں 4 ہزار 416 ڈالر تھی۔پاکستان ادارہ شماریات (پی بی ایس) کے مطابق مالی سال 2023 کے ابتدائی 9 ماہ کے دوران ملک کی مجموعی گوشت کی برآمدات بڑھ کر 69 ہزار 72 ٹن (30 کروڑ 20 لاکھ ڈالر) ہو گئی، جو گزشتہ مالی سال کے اسی عرصے کے دوران 56 ہزار 397 ٹن (24 کروڑ 90 لاکھ ڈالر) تھی، یہ اضافہ مقدار میں 22.4 فیصد اور قدر میں 21 فیصد ہے۔

کریڈٹ: انڈیپنڈنٹ نیوز پاکستان-آئی این پی