طورخم سرحد پر افغان فورسز کی جانب سے ایف سی چیک پوسٹ پر فائرنگ پر ایف سی اہلکاروں کی جانب سے بھی جوابی فائرنگ کی گئی ہے، فائرنگ میں کسی جانی نقصان کی اطلاع نہیں ہے۔ سکیورٹی ذرائع کے مطابق گزشتہ روز پاکستان آنے والے افغان مریض کے ساتھی کے پاس سفری دستاویزات نہیں تھیں،بغیر سفری دستاویزات پاکستان داخل ہونے والے افغان شہری کو واپس بھیج دیا گیا۔ افغان شہری کو واپس بھیجنے پر افغان فورسز کے اہلکار مشتعل ہوگئے۔ سیکیورٹی ذرائع کا کہنا ہے کہ افغان فورسز نے طورخم سرحدی گزرگاہ کو احتجاجا بندکردیا تھا جس کے بعد سے طورخم سرحدی گزرگاہ بدستور بند ہے۔سرحدی گزرگاہ کی بندش سے پیدل آمدورفت سمیت تجارتی سرگرمیاں معطل ہیں۔ واضح رہے کہ افغان مریضوں کو پاکستان آمد کیلئے سفری دستاویزات سے استثنی حاصل ہے۔ افغان مریض کیساتھ آنے والے رشتہ دارکیلیے سفری دستاویزات لازمی ہیں۔

کریڈٹ: انڈیپنڈنٹ نیوز پاکستان-آئی این پی