طویل خشک موسم کے بعد بلوچستان کے مختلف علاقوں میں بارش اور برف باری کا سلسلہ شروع ہوگیا، محکمہ موسمیات نے ملک بھر میں بارشوں کی پیش گوئی کر دی۔اسلام آباد، پنجاب، خیبر پختونخوا، گلگت بلتستان اور کشمیر میں وقفے وقفے سے بارش اور پہاڑوں پر شدید برفباری کا امکان ہے۔ تفصیل کے مطابق کوئٹہ سمیت بلوچستان کے مختلف علاقوں میں وقفے وقفے سے بارش اور زیارت میں بدھ کی صبح سے برف باری کا سلسلہ جاری ہوگیا ۔کوئٹہ اورگردونواح میں رات گئے سے وقفے وقفے سے بارش کا سلسلہ جاری ہے، بارش کے ساتھ ہی خنکی میں بھی اضافہ ہوگیا جبکہ شہر کے متعدد فیڈرز ٹرپ ہونے سے بجلی غائب ہوگئی۔سبی اور گردونواح،مستونگ، سنجاوی، سوئی و گرد و نواح جبکہ ڈیرہ اللہ یار اور اطراف میں بھی ہلکی بارش سے موسم سرد ہوگیا۔دریں اثنا، سنجاوی کے پہاڑی علاقوں میں بارش سے ندی نالوں میں طغیانی آگئی جبکہ قلعہ عبداللہ شہر میں بارش اور پہاڑی علاقوں پر ہلکی برفباری سے سردی کی شدت میں معمولی اضافہ ہوگیا۔محکمہ موسمیات کے مطابق صوبے میں بارش کا سلسلہ اگلے آئندہ24گھنٹوں تک جاری رہنے کا امکان ہے۔دریں اثنا، محکمہ موسمیات کے مطابق ملک کے بالائی علاقوں میں بارش برسانے والا سسٹم داخل ہو گیا ہے

جس سے اسلام آباد، پنجاب، خیبر پختونخوا، گلگت بلتستان اور کشمیر میں وقفے وقفے سے بارش اور پہاڑوں پر شدید برفباری کا امکان ہے۔محکمہ موسمیات کا کہنا ہے کہ شدید برفباری کے باعث مری، گلیات، ناران اور کاغان میں سڑکیں بند ہونے کا خدشہ ہے، گلگت بلتستان، کشمیر اور دیگر پہاڑی علاقوں میں لینڈ سلائیڈنگ اور برفانی تودے گرنے کا بھی خدشہ ہے۔بر فباری کے اثرات پنجاب کے دیگر اضلاع میں بھی پہنچیں گے، سرگودھا، میانوالی، بھکر، خوشاب، حافظ آباد، گوجرانوالہ، لاہور، ٹوبہ ٹیک سنگھ، جھنگ، فیصل آباد، شیخوپورہ، نارووال اور سیالکوٹ میں بھی بارش کی پیش گوئی ہے۔ اس کے علاوہ سندھ میں موسم خشک اور جزوی طور پر ابر آلود رہے گا۔ پشاور کے بیشتر اضلاع میں مطلع جزوی ابر آلود رہنے کا امکان ہے، چترال، سوات ، شانگلہ، کوہستان، بٹگرام، تورغز مانسہرہ، مالا کنڈ، ایبٹ آباد ، صوابی ،مردان، نوشہرہ، چارسدہ ،پشاور ،کوہاٹ اور ہنگو میں بعض مقامات پر تیز ہواوں کے ساتھ بارش اور پہاڑوں پر برفباری کا امکان ہے۔ کالام میں برف باری، آسمان سے گرتے گالوں سے نظارے حسین ہوگئے، پہاڑوں نے سفید چادر اوڑھ لی۔

کریڈٹ: انڈیپنڈنٹ نیوز پاکستان-آئی این پی