وزیراعظم شہباز شریف نے کہا ہے کہ تحریک انصاف نے ایس سی او اجلاس میں پاکستان کی شرکت پر تنازع کھڑا کرنے کی کوشش کی جو انتہائی پریشان کن ہے۔سماجی رابطے کی ویب سائٹ ٹویٹر پر اظہار خیال کرتے ہوئے مسلم لیگ (ن) کے صدر شہباز شریف کا کہنا ہے کہ ماضی میں بھی عمران خان نے خارجہ پالیسی کو نقصان پہنچانے کی کوشش کی، اس میں کوئی تعجب کی بات نہیں، وہ جب اقتدار میں تھے تو انہوں نے یہی کیا۔ انہوں نے کہا کہ پی ٹی آئی کیلئے بین الریاستی تعلقات سمیت ہر چیز کھیل ہے۔واضح رہے کہ عمران خان نے بلاول بھٹو کے بھارت جانے پر تنقید کی تھی، ان کا کہنا تھا کہ ہم نے بھارت سے تعلقات توڑے تھے، بلاول کا بھارت جانے کا مطلب ہے کہ 5 اگست کو جو ہوا، پاکستان نے اسے تسلیم کر لیا۔

کریڈٹ: انڈیپنڈنٹ نیوز پاکستان-آئی این پی