سپریم کور ٹ آف پاکستان میں 6 مستقل ججز اور ایک قائم مقام جج نے اپنے عہدے کا حلف اٹھا لیا۔چیف جسٹس یحیی آفریدی نے ججز سے حلف لیا، پہلی بار تقریب حلف برداری سپریم کورٹ کے سبزہ زار میں منعقد کی گئی۔حلف اٹھانے والے 6 مستقل ججز میں جسٹس عامر فاروق، جسٹس اشتیاق ابراہیم، جسٹس شکیل احمد، جسٹس شفیع صدیقی، جسٹس صلاح الدین پنہور اور جسٹس ہاشم کاکڑ شامل ہیں۔جسٹس میاں گل حسن اورنگزیب نے بھی بطور قائم مقام جج سپریم کورٹ اپنے عہدے کا حلف اٹھالیا، چیف جسٹس آف پاکستان جسٹس یحیی آفریدی نے جسٹس میاں گل حسن اورنگزیب سے قائم مقام جج کے عہدے کا حلف لیا۔سپریم کورٹ میں پہلی بار عدالتی احاطے کے سبزہ زار میں منعقد ہ تقریب حلف برداری میں سپریم کورٹ اور ہائیکورٹ کے ججز صاحبان، اٹارنی جنرل، ججز کے اہلخانہ، پاکستان بار کونسل، سپریم کورٹ بار کونسل کے عہدیداران اور وکلا کی بڑی تعداد نے شرکت کی۔ دریں اثنا، اسلام آباد ہائیکورٹ کے جسٹس سردار محمد سرفراز ڈوگر نے قائم مقام چیف جسٹس اسلام آباد ہائیکورٹ کا حلف اٹھالیا۔ ایوان صدر میں منعقدہ تقریب حلف برداری میں صدر مملکت آصف علی زرداری نے جسٹس سردار محمد سرفراز ڈوگر سے قائم مقام چیف جسٹس کے عہدے کا حلف لیا، جسٹس سردار محمد سرفراز ڈوگر نئے چیف جسٹس کی تعیناتی تک قائم مقام چیف جسٹس کے فرائض انجام دیں گے۔

ادھر سندھ ہائیکورٹ کے جسٹس محمد جنید غفار نے قائم مقام چیف جسٹس کے عہدے کا حلف اٹھایا، گورنر ہائوس کراچی میں منعقدہ تقریب حلف برداری میں گورنر سندھ کامران ٹیسوری نے جسٹس محمد جنیدغفار سے قائم مقام چیف جسٹس کا حلف لیا۔تقریب حلف برداری میں جسٹس ظفر راجپوت، جسٹس ظفر اقبال، جسٹس یوسف سید، جسٹس امجد سہتو، آئینی بنچ کے سربراہ جسٹس آغا فیصل، جسٹس ثنا اکرم منہاس بھی شریک ہوئے۔یاد رہے کہ جسٹس جنید غفار 14 ستمبر 1963 میں پیدا ہوئے، 1990 میں وکالت کی ڈگری حاصل کی جبکہ 2013 میں سندھ ہائیکورٹ کے ایڈیشنل جج تعینات ہوئے۔جسٹس جنید غفار چیف جسٹس سندھ ہائیکورٹ جسٹس شفیع صدیقی اور جسٹس صلاح الدین پنہور کی سپریم کورٹ میں ترقی کے بعد سندھ ہائی کورٹ میں سنیارٹی لسٹ میں پہلے نمبر پر آگئے ہیں۔ دریں اثنا، پشاور ہائیکورٹ کے قائم مقام چیف جسٹس سید محمد عتیق شاہ نے بھی گورنر ہائوس خیبرپختونخوا میں منعقدہ تقریب حلف برداری میں اپنے عہدے کا حلف اٹھالیا۔گورنر خیبرپختونخوا فیصل کریم کنڈی نے جسٹس سید محمد عتیق شاہ سے ان کے عہدے کا حلف لیا، اس موقع پر وزیراعلی خیبرپختونخوا علی امین گنڈاپور کے علاوہ پشاور ہائیکورٹ کے ججزصاحبان، وکلا سمیت دیگر بھی شریک تھے۔علاوہ ازیں گورنر بلوچستان شیخ جعفر مندوخیل نے جسٹس اعجاز سواتی سے حلف لیا۔تقریب حلف برداری گورنر ہائوس بلوچستان میں منعقد ہوئی جس میں بلوچستان ہائی کورٹ کے سینئر ججز، وکلا اور دیگر شریک ہوئے۔

کریڈٹ: انڈیپنڈنٹ نیوز پاکستان-آئی این پی