وفاقی وزیرِ داخلہ محسن نقوی نے کہا ہے کہ بد ترین دشمن نے 16دسمبر کو معصوم بچوں اور بے گناہ اساتذہ کو ناحق شہید کیا، یہ دن ہمارے عزم کا نشان بن چکا ہے کہ ہم دہشت گردی کے خلاف لڑتے رہیں گے۔ آرمی پبلک اسکول پشاور کے شہدا کی برسی پر اپنے خصوصی پیغام میں محسن نقوی نے کہا کہ بچوں اور اساتذہ نے اپنے قیمتی لہو سے پرامن پاکستان کی بنیاد رکھی، درندہ صفت دہشت گردوں نے ننھے پھولوں کو بیدردی سے مسل کر سفاکیت کا بزدلانہ فعل کیا۔ وفاقی وزیرِ داخلہ نے کہا ہے کہ شہدائے اے پی ایس آج بھی قوم کے دلوں میں زندہ ہیں جبکہ بزدل دشمن کے لیے پاک دھرتی تنگ کر دی گئی ہے۔انہوں نے کہا کہ شہدائے اے پی ایس نے قوم کو دہشت گردی کے ناسور کے خاتمے کے لیے ایک کیا، ان کی قربانیاں پاکستان کے ہر فرد کے دل میں ہمیشہ زندہ رہیں گی، شہید بچے اور اساتذہ پوری قوم کے ہیرو ہیں۔محسن نقوی نے مزید کہا کہ ہم شہدائے اے پی ایس کے خاندانوں کو سلام پیش کرتے ہیں اور ان کے ساتھ مکمل یکجہتی کا اظہار کرتے ہیں۔انہوں نے کہا کہ پوری قوم آج شہدا کی لازوال قربانیوں پر خراجِ عقیدت پیش کر رہی ہے۔

کریڈٹ : انڈیپنڈنٹ نیوز پاکستان-آئی این پی