مسلم لیگ ن کے صدر محمد نواز شریف نے کہا ہے کہ شہباز شریف بہت محنت کر رہے ہیں، اللہ کرے ہم ایک بار پھر ٹیک آف کرسکیں، اللہ تعالی نے تیزی سے گڑھے میں گرتے ملک اور قوم کو بچا لیا، اللہ تعالی نے برکت ڈالی ہے اور بھی ڈالے گا، انشااللہ، لاہور اور پنجاب میں بہت عرصے بعد عوام میں خوشی اور اطمینان نظر آ رہا ہے۔ تفصیل کے مطابق نواز شریف اور وزیراعلی پنجاب مریم نواز سے لاہور ڈویژن کے اراکین پنجاب اسمبلی نے ملاقات کی ہے، اس موقع پر گفتگو کرتے ہوئے نواز شریف نے کہا کہ شہباز شریف بہت محنت کر رہے ہیں، اللہ کرے ہم ایک بار پھر ٹیک آف کرسکیں۔انہوں نے کہاکہ لاہور اور پنجاب میں بہت عرصے بعد عوام میں خوشی اور اطمینان نظر آ رہا ہے، اللہ تعالی کا شکر ادا کرتے ہوئے محنت سے عوام کی خدمت کا سفر جاری رکھنا ہے۔نواز شریف نے کہا کہ اللہ تعالی نے برکت ڈالی ہے،انشااللہ، اور بھی ڈالے گا، اللہ تعالی نے تیزی سے گڑھے میں گرتے ملک اور قوم کو بچا لیا۔انہوں نے کہا کہ زندگی میں بہت اتار چڑھائو دیکھے ہیں، مسلم لیگ ن آتی ہے تو ملک میں ترقی آتی ہے، ڈی ریل نہ کیا جاتا تو آج پاکستان کہیں آگے ہوتا، 1990 کا سفر جاری رہتا تو پاکستان ترقی کے سفر میں آج کہیں آگے کھڑا ہوتا۔نواز شریف نے کہا کہ مہنگائی میں کمی سے عوام کو سکھ کا کچھ سانس آیا ہے، پالیسی ریٹ 22 سے کم ہو کر 12 فی صد پر آنا معاشی بہتری کی علامت ہے۔اس موقع پر ارکان اسمبلی نے کہاکہ وزیراعظم شہباز شریف اور وزیر اعلی مریم نواز شریف نے پاکستان کی ترقی اور عوام کی خدمت کی ایک نئی روشن مثال قائم کی ہے۔

انہوں نے نواز شریف کو مخاطب کرتے ہوئے کہاکہ آپ کی اور شہباز شریف کی روایات جس شاندار طریقے سے چل رہی ہیں، وہ بے مثال ہے، ہمیشہ مسلم لیگ ن کے دور میں ہی ثقافت کو ترقی ملتی ہے، آپ جب جب آتے ہیں مسلم لیگ ن آتی ہے، ملک کو ترقی، روشی، خوشیاں اور رنگ ملتے ہیں۔اس موقع پر ارکان اسمبلی نے کہاکہ مریم نواز شریف پنجاب کا فخر ہے، نظام کی جو اصلاح مریم نواز نے کی اس کی اور مثال نہیں ملتی، ای ٹینڈرنگ کا شفاف نظام شروع کیا گیا، میرٹ پر یکساں اور معیاری ترقی کا۔سفر آگے بڑھ رہا ہے، واہگہ ٹورازم کوریڈور کی تعمیر بے مثال ہے، پنجاب کی کی خوشیاں واپس آ رہی ہیں۔اجلاس کے شرکا نے پنجاب میں ترقیاتی کاموں اور عوامی منصوبوں پر بھی وزیراعلی مریم نوازشریف کو خراج تحسین پیش کرتے ہوئے کہا کہ ایک سال میں صوبہ پنجاب کا ہر شعبہ ترقی کی طرف گامزن ہوا ہے۔ارکان اسمبلی نے ستھرا پنجاب، کسان کارڈ، ٹریکٹر اورجدید زرعی مشینری، اسکالرشپ پروگرام کی فراہمی، سڑکوں کی تعمیر و بحالی، دھی رانی پروگرام، بنیادی و دیہی مراکز اور صحت کے پورے نظام کی اپ گریڈیشن پر بھی وزیر اعلی کو خراج تحسین پیش کیا۔اس موقع پر وزیراعلی پنجاب مریم نواز نے کہاکہ نواز شریف اور شہباز شریف کا نام آئے تو عوام کی خدمت کی مثال بننا ہی پڑتا ہے، اللہ تعالی کے فضل سے نواز شریف پاکستان کی ترقی کا نام ہے، اور ہم سب اِن کے سپاہی ہیں۔اجلاس میں عوامی فلاح کے منصوبوں اور مستقبل کی سیاسی حکمت عملی پر مشاورت بھی ہوئی۔

کریڈٹ: انڈیپنڈنٹ نیوز پاکستان-آئی این پی