اسلام آباد انسداد دہشت گردی عدالت نے رہنما تحریک انصاف شاہ محمود قریشی کی عبوری ضمانت میں 18 جولائی تک توسیع کر دی۔ انسداد دہشتگردی عدالت اسلام آباد کے جج ابوالحسنات نے شاہ محمود قریشی کے خلاف مقدمے کی سماعت کی۔ جج نے کیس کی تحقیقات میں پیشرفت سے متعلق پوچھا جس پرتفتیشی افسر نے بتایا کہ تحقیقات ابھی مکمل نہیں ہوئیں، شاہ محمود قریشی کے وکیل بولے میرے موکل کا کوئی ٹویٹ ریکارڈ پر نہیں ہے۔ عدالت نے استفسار کیا کہ شاہ محمود قریشی کے خلاف سماعت 17 جولائی تک ملتوی کردیتے ہیں۔ دوران سماعت شاہ محمود قریشی نے بتایا کہ 17 کو ملتان میں 5 مقدمات کی سماعت ہے، اس پر جج نے ریمارکس دئیے وہاں استثنی لے لیجے گا، میں یہاں کارروائی آگے بڑھانا چاہتا ہوں۔ شاہ محمود قریشی نے کہا کہ 17 کے بجائے 18 کو سماعت رکھ لیں جس کے بعد عدالت نے دونوں کیسز میں سماعت 18 جولائی تک ملتوی کردی۔

کریڈٹ: انڈیپنڈنٹ نیوز پاکستان-آئی این پی