سانحہ آرمی پبلک سکول (اے پی ایس) پشاورکی دسویں برسی پیر کو انتہائی عقیدت و احترام سے منائی گئی ،شہداء کی یاد میں ملک بھر میں دعائیہ تقریبات کا اہتمام کیا گیا ، شمعین روشن کی گئیںاور زبر دست خراج عقیدت پیش کیا گیا ۔تعلیمی اداروں میں تعطیل رہی ۔تفصیل کے مطابق 16 دسمبر سال 2014 کو امن اور تعلیم کے دشمنوں نے آرمی پبلک سکول پر حملہ کیا، دہشت گرد سکول کے عقبی راستے سے صبح 10 بجے کے قریب عمارت میں داخل ہوئے، اس وقت آٹھویں ،نویں اور دسویں جماعت کے طالب علم آڈیٹوریم میں تربیت میں مشغول تھے۔دہشت گردوں نے ہال میں داخل ہوتے ہی ہر طرف اندھا دھند فائرنگ شروع کردی اور اے پی ایس کی دیواروں کو خون سے رنگ دیا، دہشتگردوں کی فائرنگ سے پرنسپل ،اساتذہ ،طلبہ اور دیگر عملے سمیت 140 سے زائد افراد شہید ہوئے۔سکیورٹی فورسز کے جوانوں نے بھرپورکارروائی کرتے ہوئے دہشت گردوں کو ان کے انجام تک پہنچایا، سانحہ اے پی ایس نے دہشتگردی کے خلاف جنگ میں نئی روح پھونکی، نیشنل ایکشن پلان تشکیل دیا گیا اور قبائلی علاقوں سے دہشتگردی کا خاتمہ ممکن ہوا۔

بعدازاں اے پی ایس حملے میں ملوث 6 دہشتگردوں کو سکیورٹی فورسز نے گرفتار کیا جنہیں ملٹری کورٹس نے موت کی سزائیں بھی سنائی تھیں۔سانحہ آرمی پبلک سکول کو دس سال بیت گئے لیکن اس افسوسناک واقعہ کی یادیں آج بھی دلوں میں زندہ ہیں۔ سانحہ اے پی ایس پشاور کی دسویں برسی کے موقع پر ملک بھر میںتقریبات کا اہتمام کیا گیا اور شہداکے ایصال ثواب کیلئے دعائیں مانگی گئیں ۔شمعیں روشن کی گئیںاور شہداکو خراج عقیدت پیش کیا گیا ۔اس موقع پر وطن عزیز پاکستان سے دہشت گردی کی لعنت کو جڑسے اکھاڑ پھینکنے کے عزم کا اعادہ کیا گیا ۔صدر مملکت آصف زرداری، وزیر اعظم شہبازشریف سمیت دیگر رہنمائوں نے اپنے اپنے پیغامات میں شہدائے سانحہ اے پی ایس کو خراج عقیدت پیش کیا ۔اس دن کی مناسبت سے تعلیمی ادار ے بندرہے ۔سکول کے بچوں نے مختلف تقریبات میں حصہ لیا اور شہید بچوں کوخراج عقیدت پیش کیا گیا ۔

کریڈٹ : انڈیپنڈنٹ نیوز پاکستان-آئی این پی